Tue | Dec 6, 2016

‘Outameni’ one next crosses

Published:Sunday | November 16, 2014 | 12:00 AM

CHAKA-CHAKA SPELIN

Wa mek Govament tek poor people money go buy Outameni? Dem no got enough crosses? Dem waan more? Housing Trust claim seh dem buy Outameni fi build up Trelawny. Di people dem weh lucky fi get Housing Trust house no got plenty place fi go breeze out. So a dat mek Housing Trust turn tour operator? No sah!

No get mi wrong. A no ongle foreigner fi enjoy wi nice-nice country. Jamaica people supposen fi walk bout all bout fi wi owna yaad. Wen mi a pikni, a one time fi di year wi go pon church outnin! One time! Wi lef Kingston go a Porto Seco beach. An if wi lucky, wi go a Castleton Garden couple time. Nuff a wi lef Jamaica gaan a foreign an wi no know di whole a fi wi lickle island. Dat well bad.

'The Outameni Experience' did set up fi mek money offa di tourist dem weh come a Falmouth pon cruise ship. But Outameni never get nuff foreign tourist. An some a dem weh do go fi di 'Experience' no like it to dat - ascorden to Trip Advisor website. Ongle seven smaddy write wa dem tink bout Outameni. One seh 'excellent'; two seh 'very good'; two seh 'average'; one se 'poor'; an one seh 'terrible'.

'A RIP-OFF, A SCAM, A SHAME'

Hear wa di 'terrible' smaddy seh: "The $36 admission price per person is the first red flag. The attraction had hoped to take visitors through the "History of Jamaica", and that it does.... [sic] As a High School Project for "Jamaica Day", [sic] but to invite the public to come and pay US$ 36.00 is a rip-off, a scam, a shame. At $10-$15, it may be more palatable, and get more visitors."

Dis a wa di 'excellent' smaddy seh: "During a recent visit to Jamaica, some friends of mine who live on the island took me [on the] Outameni Experience. I was amazed and moved at what I saw - especially as the daughter of a Jamaican father. I cried and laughed and danced and felt so connected to my culture. It was an awesome experience and a must see for everyone!" Look like da woman ya never ha fi pay di 36 dollar.

Di 'terrible' smaddy mek one good point: "I did note that although 2 Cruise ships were docked in Montego Bay, and 2 Mega Cruise ships were docked in Falmouth, Outameni had only myself and a bus-load of pre-school children. And Pre-school, and primary school children is [sic] exactly what Outameni would most entertain. The Jamaican Ministry of Education should take note of this, and encourage more school visits ... ."

So it look like seh Housing Trust buy Outameni fi set up school! Housing Trust money fi build house. Mek Trelawny people go walk bout Jamaica as dem please! Housing Trust can't force nobody fi go a Outameni. It nah go work. Housing Trust a sell out poor people. Dat a one next "rip-off, a scam, a shame". An wi a talk bout nuff-nuff more money than 36 dollar!

PRAPA-PRAPA SPELIN

Wa mek Govament tek puor piipl moni go bai Outameni? Dem no gat inof kraasiz? Dem waahn muor? Ouzn Chros kliem se dem bai Outameni fi bil op Trelawny. Di piipl dem we loki fi get Ouzn Chros ous no gat plenti plies fi go briiz out. So a dat mek Ouzn Chros ton tuor aparieta? Nuo sa!

No get mi rang. A no ongl farina fi enjai wi nais-nais konchri. Jamieka piipl supuozn fi waak bout aal bout fi wi uona yaad. Wen mi a pikni, a wan taim fi di ier wi go pan choch outnin! Wan taim! Wi lef Kingston go a Porto Seco biich. An if wi loki, wi go a Castleton gyaadn kopl taim. Nof a wi lef Jamieka gaan a farin an wi no nuo di uol a fi wi likl aislan. Dat wel bad.

The Outameni Experience did set op fi mek moni aafa di tuoris dem we kom a Falmouth pan kruuz ship. Bot Outameni neva get nof farin tuoris. An som a dem we du go fi di 'Experience' no laik it tu dat - azkaadn to Trip Advisor websait. Ongl sevn smadi write wa dem tingk bout 'Outameni'. Wan se 'excellent'; tuu se 'very good'; tuu se 'average'; wan se 'poor'; an wan se 'terrible'.

A RIP-OFF, A SCAM, A SHAME

Ier wa di 'terrible' smadi se: "The $36 admission price per person is the first red flag. The attraction had hoped to take visitors through the "History of Jamaica", and that it does.... [sic] As a High School Project for "Jamaica Day", [sic] but to invite the public to come and pay US$ 36.00 is a rip-off, a scam, a shame. At $10-$15, it may be more palatable, and get more visitors".

Dis a wa di 'excellent' smadi se: "During a recent visit to Jamaica, some friends of mine who live on the island took me [on the] Outameni Experience. I was amazed and moved at what I saw - especially as the daughter of a Jamaican father. I cried and laughed and danced and felt so connected to my culture. It was an awesome experience and a must see for everyone!" Luk laik da uman ya neva ha fi pie di 36 dala.

Di 'terrible' smadi mek wan gud paint: "I did note that although 2 Cruise ships were docked in Montego Bay, and 2 Mega Cruise ships were docked in Falmouth, Outameni had only myself and a bus-load of pre-school children. And Pre-school, and primary school children is [sic] exactly what Outameni would most entertain. The Jamaican Ministry of Education should take note of this, and encourage more school visits ... ."

So it luk laik se Ouzn Chros bai 'Outameni' fi set op skuul! Ouzn Chros moni fi bil ous. Mek Chrilaani piipl go waak bout Jamieka az dem pliiz! Ouzn Chros kyaahn fuors nobadi fi go a Outameni. It naa go work. Ouzn Chros a sel out puor piipl. Dat a wan neks "rip-off, a scam, a shame". An wi a taak bout nof-nof muor moni dan 36 dala!

n Carolyn Cooper is a teacher of English language and literature. Visit her bilingual blog at http://carolynjoycooper.wordpress.com. Email feedback to columns@gleanerjm.com and karokupa@gmail.com.