Tue | Apr 25, 2017

Big tingz a gwaan fi Mis Lou

Published:Sunday | February 15, 2015 | 2:00 AM

 

CHAKA-CKAKA SPELIN

 

Miss Lou dead an gone. Bot wi naa figet weh shi do fi big up fi wi Jamaica culture. A she mek plenty a wi know she wi no ha fi shame bout fi wi heart language. It a no no bad talking. A one good-good sinting. Wen wi long-time people dem did come from Africa, dem never get no chance fi walk wid dem bag an pan. Dem come wid dem two long hand. Tie up. A thief dem thief de man bring dem ya so. Dem never plan fi come.

Still for all, dem bring nuff culture inna dem head cup. It did full up. Dem bring dem talent an dem skill. Dem a farmer, artist, doctor, lawyer, teacher, soldier, banker, cook, stylist - all kind a different-different profession. An dem bring dem whole heap a language from all bout. Wen di English people dem force on fi dem one dehgeh-dehgeh language pon di African people dem, dem dis twist it up, an bruck it up, an mix it up wid fi dem owna language dem. An dem mek up one new language. Jamaican.

Tuesday gone, di first book weh write bout Miss Lou launch up a University of the West Indies, Mona. A Prof Mervyn Morris write it. An a Ian Randle Publishers bring it out. It name Miss Lou: Louise Bennett an Jamaican Culture. Prof Morris tell wi bout di whole a Miss Lou life.

Den im talk bout how shi did act inna pantomine an shi write some a dem. An shi did collect up Anansi story. An shi do Ring Ding programme pon TV. An shi write nuff poem. An Prof Morris tell wi bout Miss Lou an fi her Aunty Roachy weh did deh pon radio. Di last-last ting Prof Morris tel wi bout a di dead lef. Wa Mis Lou call di 'whole a heap a culture an tradition an birthright' weh left fi wi.

 

RESPECT DUE!

 

An a Prof Eddie Baugh launch di book. Im show wi seh a long time now Prof Morris did a study Miss Lou. In a 1963, im did preach one sermon, 'On Reading Louise Bennett, Seriously'. Yu see dat deh comma. It serious. It mean fi seh a no joke Prof Morris a joke.

Im know seh wen certain people hear bout 'reading' Miss Lou, dem a go waan laugh. Dem no know seh Miss Lou write down her poem dem, fi instance. Dem tink she shi dis get up an chat. Nutten no go so. Wi ha fi understand seh Miss Lou sit down an tink bout wa shi a go get up an seh. Rispek juu!

Dis ya Torsde, Prof Morris an Prof Baugh a go deh pon NewsTalk 93FM a talk bout di book. A di programme Big Tingz a Gwaan, weh mi an di yute Tyane Robinson do. It broadcast 4:30 in a di afternoon. An it come on back pon Saturday 2:30. So unu fi try ketch it. Wi talk in a so-so Jamaican.

Den mi deh a Liguanea Plaza last year an one man pass mi an seh, "Miss Lou daughter"! It sweet mi so till. One a di ting mi find out in a Prof Morris book a dis: Miss Lou womb did tek out chruu it did a gi her problem. So shi couldn't have no pikni. Well, mi know seh Miss Lou got nuff culture pikni an gran-pikni an great-gran-pikni. Give thanks!

 

PRAPA-PRAPA SPELIN

 

Mis Lou ded an gaan. Bot wi naa figet we shi du fi big op fi wi Jamieka kolcha. A shi mek plenti a wi nuo se wi no afi shiem bout fi wi aat langwij. It a no no bad taakin. A wahn gud-gud sinting. Wen wi lang-taim piipl dem did kom fram Afrika, dem neva get no chaans fi waak wid dem bag an pan. Dem kom wid dem tuu lang an. Tai op. A tiif dem tiif de man bring dem ya so. Dem neva plan fi kom.

Stil far aal, dem bring nof kolcha ina dem ed kop. It did ful op. Dem bring dem talent an dem skil. Dem a faama, aatis, dakta, laaya, tiicha,suoja, bangka, kuk, stailis - aal kain a difran-difran profeshan. An dem bring dem uol iip a langwij fram aal bout. Wen di Inglish piipl dem fuos aan fi dem wan dege, dege langwij pan di Afrikan piipl dem, dem dis twis it op, an brok it op, an miks it op wid fi dem uona langwij dem. An dem mek op wahn nyuu langwij. A wii dat. Jamiekan.

Chuuzde gaan, di fosbuk we rait bout Mis Lou laanch op a University of the West Indies, Mona. A Prof Mervyn Morris rait it. An a Ian Randle Publishers bring it out. It niem Miss Lou: Louise Bennett an Jamaican Culture. An Prof Morris tel wi bout di uol a Mis Lou laif.

Den im taak bout ou shi did a kina pantomain an shi rait som a dem. An shi did kalek op anansi tuori. An shi du Ring Ding pruogram pan TV. An shi rait nof puoem. An Prof Morris tel wi bout Mis Lou an fi aar Aunty Roachy we did de pan riedyo. Di laas-laas ting Prof Morris tel wi bout a di ded lef. Wa Mis Lou kaal di 'whole a heap a culture an tradition an birthright' we lef fi wi.

 

RISPEK JUU!

 

An a Prof Eddie Baugh laanch di buk. Im shuo wi se a lang taim nou Prof Morris did a stodi Mis Lou. In a 1963, im did priich wahn sorman, 'On Reading Louise Bennett, Seriously'. Yu si dat de kama. It siiryos. It miin fi se a no juok Prof Morris a juok.

Im nuo se wen sortn piipl ier bout 'reading' Mis Lou, dem a go waahn laaf. Dem no nuo se Mis Lou rait dong aar puoem dem, fi instans. Dem tingk se shi dis git op an chat. Notn no go so. Wi a fi andastan se Mis Lou sidong an tingk bout wa shi a go get op an se. Rispekjuu!

Dis ya Torzde, Prof Morris an Prof Baugh a go de pan NewsTalk 93FM a taak bout di buk. A di pruogram Big Tingz a Gwaan, we mi an di yuut Tyane Robinson du. It braadkyaas 4:30 in a di aaftanuun. An it kom aan bak pan Satide 2:30. So unu fi chrai kech it. Wi taak in a suoso Jamiekan.

Den mi de a Liguanea Plaza laas ier an wahn man paas mi an se, "Mis Lou daata!" It swiit mi so til. Wan a di ting mi fain out in a Prof Morris buk a dis: Mis Lou uum did tek out chruu it did a giar problem. So shi kudn av no pikni. Wel, mi nuo se Mis Lou gat nof kolcha pikni an gran-pikni an griet-gran-pikni. Giv tangks!

- Carolyn Cooper is a teacher of English language and literature. Visit her bilingual blog at http://carolynjoycooper.wordpress.com. Email feedback to columns@gleanerjm.com and karokupa@gmail.com