Fri | Apr 28, 2017

Old man no fi grudge young boy

Published:Sunday | May 17, 2015 | 5:00 AM

 

CHAKA-CHAKA SPELLING

 

It no right fi old man a grudge young boy. Some a dem old man must be figet seh dem did young one time. A no like seh dem born old. Dem did get fi dem chance fi live young-boy life. An pick an choose dem woman-friend. An mek fi dem owna mistake. So wa mek dem no stop diss di young boy dem? Dem no have nutten good fi seh bout dem.

Chruu nuff a dem old man a look young gyal, dem can't believe seh young boy coulda want big woman. A must someting di young boy dem a look. Money, car, house, land. A coulda never di so-so woman sweet dem. No matter if she a healthy-body woman; an she know how fi treat man; an she just nice-nice. She no have nutten weh di old man want. So ascorden to him, no young boy can't want her fi nutten good.

Wat some a dem old man no know, a no all young boy a look big woman fi mind dem. Some a di young boy dem a mek good-good money. Legal. Dem no ha fi a beg woman nutten. Dem deh youth have ambition. An dem no prejudice gainst big woman. Dem two yeye wide open. Dem see one big uman an dem skin ketch fire. Dem just love how she flex. An dem put argument to her.

If it sweet her, she mighta tek on di youth. A no like she dem a plan fi seh 'I do'. Dem just a seh, 'See me ya.' Ya so. Fi now. An if dem lucky, it sweet-sweet. A it dat. An it mighta last one night, one week, one month, one year. It coulda gwaan long-long. An wen it done, it done! An nobody no ha fi bex wid nobody. A so it go.

 

NO BODDER TALK BOUT VIAGRA

 

Then some a di old man dem love fi gi advice to big woman. A warn dem seh di young boy dis a use dem. Fi wa? Money? Sex? Deh so a di problem. A dat mek di old man dem so bad-mind an grudgeful. Di ting weh young boy have over old man a stamina! An dat a one a di ting weh big woman a look fa. Di old man dem no got it. No matter how dem chat. An no bodder talk bout Viagra. A no di same ting. Any stand weh last fi more than four hour can't good. Dat a kill dead sinting.

But mek mi tell unu someting. A no ongle old man a diss young boy. Some a di said same big woman dem weh tek up wid young boy a diss dem. One youth tell mi she im did deh wid a big woman. An any time im go a her yard all she waan do a sex im. Like im a human vibrator. An im seh it hurt im. Sometime im just waan fi talk. Seet deh! Man an woman story no easy.

Di big woman dem ha fi treat di young boy dem better. Dem can't gwaan Iike she di yute a machine an dem waan wear out im battery. Still for all, if young boy an big woman waan fi try a ting, mek dem dweet. Nobody can't tell dem which combination nah go work. A no padlock. A life! Some a dem outa-order old man better mind dem owna business an stop tell people how fi live dem life.

 

PRAPA-PRAPA SPELIN

 

It no rait fi uol man a groj yong bwai. Som a dem uol man mosi figet se dem did yong wan taim. A no laik se dem baah nuol. Dem did get fi dem chaans fi liv yong-bwai laif. An pik an chuuz dem uman-fren. An mek fi dem uona mistiek. So wa mek dem no tap dis di yong bwai dem? Dem no av notn gud fi se bout dem.

Chruu nof a dem uol man a luk yong gyal, dem kyaahn biliiv se yong bwai kuda waahn big uman. A mos somting di yong bwai dem a luk. Moni, kyaar, ous, lan. A kuda neva di suo-so uman swiit dem. No mata if shi aelti-badi uman; an shi nuo ou fi chriit man; an shi jos nais-nais. Shi no av notn we di uol man waahnt. So azkaadn tu im, nuo yong bwai kyaahn waahnt ar fi notn gud.

Wat som a dem uol man no nuo, a no aal yong bwai a luk big uman fi main dem. Som a di yong bwaidem a mek gud-gud moni. Liigal. Dem no a fi a beg uman notn. Dem de yuut av ambishan. An dem no prejudis gens big uman. Dem tuu yai waid uopn. Dem si wan big uman an dem skin kech faiya. Dem jos lov ou shi fleks. An dem put aagyument tu ar.

If it swiit ar, shi maita tek aan di yuut. A no laik se dem a plan fi se 'I do'. Dem josa se, 'Si mi ya.' Ya so. Fi nou. An if dem loki, it swiit-swiit. A it dat. An it maita laas wan nait, wan wiik, wan mont, wan ier. It kuda gwaahn lang-lang. An wen it don, it don! An nobadi no a fi beks wid nobadi. A so it go.

 

NO BADA TAAK BOUT VIAGRA

 

Den som a di uol man dem lov fi gi advais tu big uman. A waan dem se di yong bwai dis a yuuz dem. Fi wa? Moni? Seks? De so a di prablem. A dat mek di uol man dem so bad-main an grojful. Di ting we yong bwai av uova uol man a stamina! An dat a wan a di ting we big uman a luk fa. Di uol man dem no gat it. No mata ou dem chat. An no bada taak bout Viagra. A no di siem ting. Eni stan we laas fi muor dan fuor ouwa kyaahn gud. Dat a kilded sinting.

Bot mek mi tel unu somting. A no ongl uol man a dis yong bwai. Som a di sedsiem big uman dem we tek op wid yong bwai a dis dem. Wan yuut tel mi se im did de wid a big uman. An eni taim im go aar yaad, aal shi waahn du a seks im. Laik im a yuuman vaibrieta. An im se it ort im. Somtaim im jos waahn fi talk.Siit de! Man an uman tuori no iizi.

Di big uman dem a fi chriit di yong bwai dem beta. Dem kyaahn gwaan Iaik se di yuut a mashiin an dem waahn wier out im bachri. Stil far aal, if yong bwai an big uman waahn fi chrai a ting, mek dem dwiit. Nobadi kyaahn tel dem wich kombinieshan naa go work. A no padlak. A laif! Som a dem outa aada uol man beta main dem uona bizniz an stap tel piipl ou fi liv dem laif.

- Carolyn Cooper is a teacher of English language and literature. Visit her bilingual blog at http://carolynjoycooper.wordpress.com. Email feedback to columns@gleanerjm.com and karokupa@gmail.com.