Fri | Oct 20, 2017

John Crow, jang kro an vulture

Published:Sunday | July 19, 2015 | 12:00 AM

CHAKA-CHAKA SPELLING

Seet deh now! Language a one powerful sinting. Unu memba dem ya liriks wi did larn a primary school? 'Sticks and stones may break my bones but words can never harm me.' Pure lie! Nutten no go so. Throw word a one big stick. An it lik hot. Wen yu a pikni, an dem odder one a throw word pon yu, yu ha fi a gwaan like seh it no bodder yu. Cau yu cyaan do better.

But wen yu grow big, yu naa tek it. Yu ha fi defend yuself. So mi understand wa mek di Labourite dem bex an a carry on bad bout wa Peter Bunting seh: "Some in the Jamaica Labour Party (JLP) leadership have been behaving like a set of John Crows, like vultures, gleefully reacting to every loss of life as an opportunity to gain political mileage."

A di 'John Crow' bex dem. If Bunting did lef out di 'John Crows' an kip so-so 'vultures', di lik wuda never feel so hot. Trust mi! 'Vulture' no pretty. But inna fi wi culture, 'John Crow'worserer. All wen yu gi it di rightful sound inna fi wi language! Jangkro! No sah! It sound bad-bad.

So wa mek jang kro worserer than vulture? One a English an one a Jamaican. Vulture come outa book an jang kro down a dungle heap. Wi know vulture inna wi head; an wi feel jang kro inna wi heart. Fi wi language carry feelings. An a dat di language specialist dem mean wen dem seh Jamaican a fi wi heart language. It mek wi tek tings hard.

COCK MOUT KILL COCK

Still for all, if me was Andrew Holness, mi wudn waste no time pon 'jang kro'. Dat bad an no so bad. A 'political mileage' mi wuda kick up gainst! Dat a one serious charge Bunting a mek. One big-big lik. Fi tink seh di JLP politician dem no cyah bout di whole heap a people weh a dead off? Murder top a murder! An a ongle vote dem a look, mek dem a bawl out? Dat bad - if a true. An mi no hear none a di Labourite dem a talk bout dat. All dem a stick pon a di jang kro throw word.

All eena Parliament, Desmond McKenzie im seh, "Once a John Crow, always a John Crow." Wa dat good fa? A Bunting im a throw word pon? Dat a no how some a di PNP member dem tek it. Ascorden to Gleaner, dem laugh an seh, "Yuh seh so! Yuh seh so!" Dem a tek McKenzie mek poppy show. Dem a tell im seh cock mout kill cock. Mi no know if Bunting sorry fi true fi weh im seh. But it look like dem odder one inna fi im party no sorry to dat. Or dem wudn bodder she nutten to McKenzie fi blaze up more fire.

Anyhow, mi tink seh Andrew Holness shuda condemn Bunting fi di 'political mileage' big lik. Opposition party supposen fi bawl out gainst govament wen tings naa run right. An if PNP did deh inna Opposition, dem wuda do di said same ting. Dem naa no argument. An if mi a jang kro, mi wuda well bex fi see how di politician dem a mix mi up inna fi dem nasty business.

PRAPA-PRAPA SPELIN

Siit de nou! Langwij a wan powaful sinting. Unu memba dem ya liriks wi did laan a praimeri skuul? 'Sticks and stones may break my bones but words can never harm me.' Pyuur lai! Notn no go so. Chruo wod a wan big stik. An it lik at. Wen yu a pikni, an dem ada wan a chruo wod pan yu, yu a fi a gwaahn laik se it nobada yu. Kaa yu kyaahn du beta.

Bot wen yu gruo big, yu naa tek it. Yu a fi difen yuself. So mi andastan wa mek di Liebarait dem beks an a kyari aan bad bout wa Peter Bunting se: "Some in the Jamaica Labour Party (JLP) leadership have been behaving like a set of John Crows, like vultures, gleefully reacting to every loss of life as an opportunity to gain political mileage."

A di 'John Crow' beks dem. If Bunting did lef out di 'John Crows' an kip suoso 'vultures', di lik wuda neva fiil so at. Chros mi! 'Vulture' no priti. Bot ina fi wi kolcha, 'John Crow' wosara. Aal wen yu gi it di raitful soun ina fi wi langwij! Jang kro! Nuosa! It sounbad-bad.

So wa mek jang krow osa dan vulture? Wan a Inglish an wan a Jamiekan. Vulture kom outa buk an jang kro dong a dongl iip. Wi nuo vulture ina wi ed; an wi fiil jang kro ina wi aat. Fi wi langwij kyari fiilinz. An a dat di langwij speshalis dem miin wen dem se Jamiekan a fi wi aat langwij. It mek wi tek tingz aad.

KAK MOUT KIL KAK

Stil far aal, if mii woz Andrew Holness, mi udn wies no taim pan 'jang kro'. Dat bad an no so bad. A 'political mileage' mi uda kik op gens! Dat a wan siiryos chaaj Bunting a mek.' Wan big-big lik. Fi tink se di JLP palitishan dem no kya bout di uol iip a piipl we a ded aaf? Morda tap a morda! An aongl vuot dem a luk mek dem a bawl out? Dat bad - if a chruu. An mi no ier non a di Liebarait dem a taak bout dat. Aal dem a stik pan a di jang kro chruo wod.

Aal iina Paaliment, Desmond McKenzie im se, "Once a John Crow, always a John Crow." Wa dat gud fa? A Bunting im a chruo wod pan? Dat a no ou som a di PNP memba dem tek it. Azkaadn tu Gleaner, dem laaf an se, "Yuh seh so! Yuh seh so!" Dem a tek McKenzie mek papi shuo.Dem a tel im se kak mout kil kak. Mi no nuo if Bunting sari fi chruu fi we im se. Bot it luk laik dem ada wan ina fi im paati no sari tu dat. Ar dem udn bada se notn tu McKenzie fi bliez op muor faiya.

Eniou, mi tingk se Andrew Holness shuda kandem Bunting fi di 'political mileage' big lik. Opozishan paati supuozn fi baal out gens govament wen tingz naa ron rait. An if PNP did de ina Opozishan, dem uda du di sed siem ting. Dem naa no aagyument. An if mii a jang kro, mi uda wel beks fi si ou di palitishan dem a miks mi op iina fi dem naasi bizniz.

- Carolyn Cooper is a teacher of English language and literature. Visit her bilingual blog at http://carolynjoycooper.wordpress.com. Email feedback to columns@gleanerjm.com and karokupa@gmail.com.