Fri | Aug 18, 2017

Mek Sista P tek her time!

Published:Sunday | January 24, 2016 | 1:00 AM

 

CHAKA-CHAKA SPELLING

 

Wat a way certain people a run down Sista P fi call election! A wa mek? Ascorden to Constitution, election no ha fi call so till way down a April 2017! Di way me seet, since Sista P never call election last year, she might as well tek her time decide her mind.

Dem a throw word pon Sista P seh she no know weh she a do. She dis a wait-wait an dem no know a wa she a wait fa. She mek dem know seh she a wait pon God. An a it mek dem a tek her mek poppyshow. If plenty a dem odder politician did wait pon God fi tell dem weh fi do, tings mighta plenty better fi wi. It look like a devil a tell some a dem weh fi do.

Suppose Sista P have big plan weh she naa tell nobody? Member seh a February 26, 2006 she beat out Peter Phillips fi turn leader a di PNP. Mi wonder if Sista P a consider fi step down after 10 year. If she do dat, PNP ha fi pick a new leader fi carry di party go eena election. An dat a go tek lickle time.

Sista P no gi mi no message fi gi unu. An God no reveal nutten to mi. Mi a no no prophet. Mi dis a wonder. An all me know, Sista P no ha fi fret bout fi her legacy. It safe. Di first woman fi turn prime minister eena Jamaica! Dat kuda never easy. An all who like gwaan like seh Sista P a eedyat, mek mi aks dem a who a di eedyat dem weh mek her turn prime minister?

 

DEM TOO RENK

 

Den mi can just see di runjostling fi tek over from Sista P. Di best candidate me tink, a di said same Peter Phillips weh Sista P did dust out fi turn party leader. Im have sense an im work hard. An it no easy fi deal wid IMF an ha fi a carry pure bad news come gi wi. Well lickle good news to. But not to dat. Fi wi dollar pop down. An it look like seh it naa go ketch up itself fi now.

If Sista P gi up di prime minister work, she have nuff tings weh she can do. Di first ting mi wuda like see her do a fi write one book bout her life. No ongle wa deh pon Wikipedia. Bill an receipt. She can get one duppy writer fi help her write di book. An she no ha fi shame fi get help. Nuff cebrelity wid book, a duppy write di book.

An wen di book come out, Sista P can go lecture all bout. A yard an abroad. Michael Manley dweet. P.J. Patterson same way. Eddie Seaga. Wen politician lef office, dem no ha fi siddung a dem yard naa do nutten. Sista P have fi her Portia Simpson Miller Foundation weh set up eena 2010. She can gwaan divel it up.

Sista P no fi mek none a di man dem shub her out a office. Dem too renk. A chruu she a woman mek dem a tek liberty wid her. Look how much old man deh eena Parliament! Anybody a tell dem fi go a dem yard? An Sista P stronger an dem. Mek dem wait! God wi tell Sista P when a di right time fi fly di gate. Time longer than rope.

 

PRAPA-PRAPA SPELIN

 

Wat a wie sortn piipl a ron dong Sista P fi kaal ilekshan! A wa mek? Azkaadn tu kanstityuushan, ilekshan no a fi kaal so til wie dong a Iepril. 2017! Di wie mii siit, sins Sista P neva kaal ilekshan laas ier, shi mait az wel tek ar taim disaid ar main.

Dem a chruo wod pan Sista P se shi no nuo we shi a du. Shi dis a wiet-wiet an dem no nuo a wa shi a wiet fa. Shi mek dem nuo se shi a wiet pan Gad. An a it mek dem a tek ar mek papishuo. If plenti a dem ada palitishan dem did wiet pan Gad fi tel dem we fi du, tingz maita plenti beta fi wi. It luk laik a debl a tel som a dem we fi du.

Supuoz Sista P av big plan we shi naa tel nobadi. Memba se a Febieri 26, 2006 shi biit out Peter Phillips fi ton liida a di PNP. Mi wanda if Sista P a kansida fi step dong aafta 10 ier. If shi du dat, PNP a fi pik a nyuu liida fi kyari di paati go iina ilekshan. An dat a go tek likl taim.

Sista P no gi mi no mechiz fi gi unu. An Gad no riviil notn tu mi. Mi a no no prafit. Mi dis a wanda. An aal mii nuo, Sista P no a fi fret bout fi ar legisi. It sief. Di fos uman fi ton praim minista iina Jamieka! Dat kuda neva iizi. An aal uu laik gwaan laik se Sista P a iidyat, mek mi aks dem a uu a di iidyat dem we mek ar ton praim minista?

 

DEM TUU RENGK

 

Den mi kyahn jos si di ronjaslin fi tek uova fram Sista P. Di bes kyandidet mi tingk, a di sed siem Peter Phillips we Sista P did dos out fi ton paati liida. Im av sens an im wok aad. An it no iizi fi diil wid IMF an a fi a kyari pyuur bad nyuuz kom gi wi. Wel likl gud nyuuz tu. Bot nat tu dat. Fi wi dala pap dong. An it luk laik se it naa go kech op itself fi nou.

If Sista P gi op di praim minista wok, shi av nof ting we shi kyahn du. Di fos ting mi wuda laik si ar du a fi rait wan buk bout ar laif. No ongl wa de pan Wikipedia. Bil an risiit. Shi kyahn get wan dopi raita fi elp ar rait di buk. An shi no a fi shiem fi get elp. Nof sibreliti wid buk, a dopi rait di buk.

An wen di buk kom out, Sista P kyahn go lekcha aal bout. A yaad an abraad. Michael Manley dwiit. PJ Patterson siem wie. Eddie Seaga. Wen palitshan lef afis, dem no a fi sidong a dem yaad naa du notn. Sista P av fi ar Portia Simpson Miller Foundation we set op iina 2010. Shi kyahn gwaan divel it op.

Sista P no fi mek non a di man dem shub ar out a afis. Dem tuu renk. A chruu shi a uman mek dem a tek libati wid ar. Luk omoch uol man de iina Paaliment! Enibadi a tel dem fi go a dem yaad? An Sista P chranga an dem. Mek dem wiet! Gad wi tel Sista P wen a di rait taim fi flai di giet. Taim langa dan ruop.

- Carolyn Cooper is a consultant on culture and development. Email feedback to columns@gleanerjm.com and karokupa@gmail.com.