Sat | Sep 23, 2017

Carolyn Cooper | Good ting Rowley never tek Gleaner advice!

Published:Sunday | July 24, 2016 | 7:00 AM

 

CHAKA-CHAKA SPELLING

 

Pon Monday, June 13, Gleaner put out one editorial, 'Why Rowley should delay his visit'. An it gi one bag a argument fi stop im from come. Im never listen. Im did wahn talk to wi bout di trouble nuff a wi have wid di T&T immigration officer dem. An im did wahn try stop di trade war. Gleaner seh Dr Rowley should-a wait so till Jamaica ready fi decide weh wi a go do bout CARICOM!

Seet ya: "But while we look forward to seeing and hearing Mr Rowley in Jamaica, we, perhaps paradoxically, would suggest that he be encouraged not to rush his visit, allowing Kingston time to complete critical bits of preparation if the trip is to deliver on its potential value to Jamaica and Trinidad and Tobago, and, ultimately, CARICOM. We refer, specifically, to the review of Jamaica's participation in CARICOM that the Jamaican Prime Minister Andrew Holness has assigned a task force to be led by one his predecessors, Bruce Golding."

Every time mi hear Bruce Golding name, mi memba Dudus. Mi no know if a me one. Mi tink Golding shoulda kip imself quiet an no bodder tek on no high-profile work. Nuff a unu nah go agree wid mi. Jamaica a one big Christian country an Bible teach wi seh wi must forgive an figet. But mi can't figet di hell of a scandal weh draw down pon Jamaica sake-a Bruce Golding an Manatt an Dudus. Anyhow, mek mi lef it. Di whole a dem wash eena di blood a di Lamb. Dudus eena prison a study fi turn preacher. Im an Al Miller can set up church wen im come out.

 

DOG NYAM WI SUPPER

 

Whosoever Prime Minister Holness aks fi run dat deh task force nah go sort out di CARICOM story quick-quick. Certain 'task' can't done quick. Di force nah go have nutten fi do. Dem ha fi stretch out di work. Dr Rowley couldn't wait pon dat. Mi glad im come now.

Look how im an fi wi Prime Minister talk nice-nice bout how dem a go deal wid di problem dem! Said same Gleaner report last week Thursday, "Prime Minister Andrew Holness and his Trinidadian counterpart Dr Keith Rowley say they have reached agreements that will reset and restore the friendship between Jamaica and Trinidad and Tobago." An Holness a go visit T&T.

It look like seh wi no need no task force. An wi no need no referendum at all, at all. Dat a big-big trouble. Mi tink seh fi wi prime minister done know seh it suit Jamaica fi tan eena CARICOM. Holness nah sing di same old Sankey wid Eddie Seaga bout 'Jamaica a misfit in CARICOM'. Dat a di headline a one column weh Seaga write an Gleaner publish pon Sunday, July 10. Holness graduate from University of the West Indies. Fi im vision bigger dan Jamaica one.

Mi ongle sorry University figet fi put up plaque fi Holness eena di park fi honour di prime minister dem weh graduate from UWI. Rowley come first im. But Holness soon get fi im big-up. Same day University honour Dr Rowley, im gi one talk a di Regional Headquarters. Im seh, if wi no work together eena CARICOM, "crapaud smoke yu pipe!" Dat mean dog nyam wi supper!

 

PRAPA-PRAPA SPELIN

 

Pan Monde, Juun 13, Gleaner put out wan edituoriyal, 'Why Rowley should delay his visit'. An it gi wan bag a aagyument fi stap im fram kom. Im neva lisn. Im did waan taak tu wi bout di chrobl nof a wi av wid di T&T immigrieshan afisa dem. An im did waan chrai stap di chried waar. Gleaner se Dr Rowley shuda wiet so til Jamieka redi fi di said we wi a go du bout CARICOM!

Siit ya: "But while we look forward to seeing and hearing Mr Rowley in Jamaica, we, perhaps paradoxically, would suggest that he be encouraged not to rush his visit, allowing Kingston time to complete critical bits of preparation if the trip is to deliver on its potential value to Jamaica and Trinidad and Tobago, and, ultimately, CARICOM. We refer, specifically, to the review of Jamaica's participation in CARICOM that the Jamaican Prime Minister Andrew Holness has assigned a task force to be led by one his predecessors, Bruce Golding."

Evri taim mi ier Bruce Golding niem, mi memba Dudus. Mi no nuo if a mii wan. Mi tingk Golding shuda kip imself kwaiyat an no bada tek aan no ai-pruofail wok. Nof a unu naa go agrii wid mi. Jamieka a wan big Krischan konchri an Baibl tiich wi se wi mos fagiv an figet. Bot mi kyaahn figet di el av a skyandal we jraa dong pan Jamieka sieka Bruce Golding an Manatt an Dudus. Eniou, mek mi lef it. Di uol a dem wash iina di blod a di Lamb. Dudus iina prizn a stodi fi ton priicha. Im an Al Miller kyahn set op choch wen im kom out.

 

DAAG NYAM WI SOPA

 

Uusoeva Praim Minista Holness aks fi ron dat de taask fuours naa go saat out di CARICOM stuori kwik-kwik. Sortn 'taask' kyaahn don kwik. Di fuors naa go av notn fi du. Dem a fi schrech out di wok. Dr Rowley kudn wiet pan dat. Mi glad im kom nou.

Luk ou im an fi wi praim minista taak nais-nais bout ou dem a go diil wid di prablem dem! Sed-siem Gleaner ripuort laas wiik Torsde, "Prime Minister Andrew Holness and his Trinidadian counterpart Dr Keith Rowley say they have reached agreements that will reset and restore the friendship between Jamaica and Trinidad and Tobago." An Holness a go visit T&T.

It luk laik se wi no niid no taask fuors. An wi no niid no referendum at aal, at aal. Dat a big-big chrobl. Mi tingk se fi wi Praim Minista don nuo se it suut Jamieka fi tan iina CARICOM. Holness naa sing di siem uol Sangki wid Eddie Seaga bout 'Jamaica A Misfit In CARICOM'. Dat a di edlain a wan kalam we Seaga rait an Gleaner poblish pan Sonde, Juulai 10. Holness gradiyiet fram Yuunivorsiti a di West Indiiz (YWI). Fi im vijan biga dan Jamieka wan.

Den mi ongl sari Yuunivorsiti figet fi put op plak fi Holness iina di paak fi ana di praim minista dem we gradiyiet fram YWI. Rowley kom fos im. Bot Holness suun get fi im big-op. Siem die Yuunivorsti ana Dr Rowley, im gi wan taak a di Riijanal Edkwaataz. Im se, if wi no wok tugeda iina CARICOM, "crapaud smoke yu pipe!" Dat miin daag nyam wi sopa!

- Carolyn Cooper is a consultant on culture and development. Email feedback to columns@gleanerjm.com and karokupa@gmail.com.