Sat | Aug 19, 2017

Carolyn Cooper | Tribal war in America!

Published:Sunday | November 20, 2016 | 11:00 AM

 

CHAKA-CHAKA SPELLING

 

Donald Trump promise white people fi "Make America Great Again". Im dweet. Inna one week, America back-back more than one hundred year! Di KKK inna dem ackee. Di Loyal White Knights of the Ku Klux Klan inna Pelham, North Carolina, a kip klavalkade Klan victory parade pon December 3. Trump a go show im face?

Wat start bad a mornin cyaan come good a evenin. Inna February 1861, seven state bruck weh from di rest a America chruu dem never waan done slavery. A dem bread an butter. South Carolina, Mississippi, Florida, Alabama, Georgia, Louisiana an Texas form fi dem Confederate govament wid dem owna flag. An a so tribal war buss out pon April 12, 1861. Four odder state join di rebel dem: Virginia, Arkansas, North Carolina an Tennessee. Trump win all a dem Confederate state, except fi Virginia!

Di Confederate dem lose di war. But dem never gi up di fight fi defend white power an hold down black people. Six veteran set up di KKK pon December 24, 1865 inna Pulaski, Tennessee. Fi dem klan never last so long. But one next klan start up inna Atlanta, Georgia, inna 1921. An it grow to bout five million member!

 

THE MARROW OF TRADITION

 

After slavery done inna 1865, black people coulda vote. An dem vote een black people inna govament inna di said same Confederate state dem. Unu fi read di book, The Marrow of Tradition, weh one black man, Charles Chesnutt, write. White people terrorise black people fi stop dem from vote.

An now black people can vote free, free, an some a dem nah vote? Oprah Winfrey did warn some a dem weh never waan vote fi Hillary Clinton chruu dem no like her. Oprah seh she nah come a unu yard. Unu no ha fi like her. But if unu know wat good fi unu, vote fi her.

Black people never vote fi Clinton di way dem did vote fi Obama. But dem vote fi her more than any odder class a voter. White man, white woman and di Evangelical Christian dem, a dem vote fi Trump. An no matter how dem seh Hillary Clinton lie an thief, she plenty better than Donald Trump. She nah stir up old-time tribal war.

Look pon disya sign weh Trump supporter dem put up inna di toilet dem a Texas State University: "Now that our man TRUMP is elected and republicans own both the senate and the house - time to organize tar and feather VIGILANTE SQUADS and go arrest and torture those deviant university leaders spouting off all this Diversity Garbage."

Pikni a bawl a school becau odder pikni a torment dem. A tell dem seh dem fi lef America go bak weh dem come from. Di pikni dem born a America. Dem nah nowhere fi go bak to. School counsellor ha fi a tek time wid plenty pikni a try mek dem feel lickle better.

Deestant people a wear safety pin fi show seh dem a go protect dem one anodder. Safety pin can stand up gainst gun? An di gunman an gunwoman dem weh no waan no gun control, dem did vote fi Trump. Im defend dem. Wat a sinting! Dis a di great America! Ongle Massa God can save America from dem great autoclaps.

 

PRAPA-PRAPA SPELIN

 

Donald Trump pramis wait piipl fi "Make America Great Again". Im dwiit. Ina wan wiik, America bak-bak muor dan wan ondred ier! Di KKK ina dem aki. Di Loyal White Knights of the Ku Klux Klan ina Pelham, North Carolina, a kip klavalkade Klan vikchri paried pan Disemba 3. Trump a go shuo im fies?

Wat staat bad a maanin kyaahn kom gud a iivnin. Ina Febieri 1861, sevn stiet brok we fram di res a America chruu dem neva waahn don slievri. A dem bred an bota. South Carolina, Mississippi, Florida, Alabama, Georgia, Louisiana an Texas faam fi dem Confederate govament wid dem uona flag. An a so chraibal waar bos out pan Iepril 12, 1861. Fuor ada stiet jain di rebl dem: Virginia, Arkansas, North Carolina an Tennessee. Trump win aal a dem Confederate stiet, eksep fi Virginia!

Di Confederate dem luuz di waar. Bot dem neva gi op di fait fi difen wait pouwa an uol dong blak piipl. Siks vetaran set op di KKK pan December 24, 1865 ina Pulaski, Tennessee. Fi dem klan neva laas so lang. Bot wan neks klan staat op ina Atlanta, Georgia, ina 1921. An it gruo tu bout faiv miliyan memba!

 

THE MARROW TRADITION

 

Aafta slievri don, blak piipl kuda vuot. An dem vuot iin blak piipl iina govament iina di sed siem Confederate stiet dem. Unu fi riid di buk, The Marrow of Tradition, we wan blak man, Charles Chesnutt, rait. Wait piipl teroraiz blak piipl fi stap dem fram vuot.

An nou blak piipl kyahn vuot frii, frii an som a dem naa vuot? Oprah Winfrey waan som a dem we neva waahn vuot fi Hillary Clinton chruu dem no laik ar. Oprah se shi naa kom a unu yaad. Unu no a fi laik ar. Bot if unu nuo wat gud fi unu, vuot fi ar.

Blak piipl neva vuot fi Clinton di wie dem did vuot fi Obama. But dem vuot fi ar muor dan eni ada klaas a vuota. Wait man, wait uman an di Ivanjelikal Krischan dem, a dem vuot fi Trump. An plenti piipl neva vuot at aal, at aal. Dem sidong kielis mek Trump win. No mata ou dem se Hillary Clinton lai an tiif, shi plenti beta dan Donald Trump. Shi naa stor op uol-taim chraibal waar.

Luk pan disya sain we Trump sopuota dem put op iina di tailit dem a Texas State University: "Now that our man TRUMP is elected and republicans own both the senate and the house - - time to organize tar and feather VIGILANTE SQUADS and go arrest and torture those deviant university leaders spouting off all this Diversity Garbage."

Pikni a baal a skuul bikaa ada pikni a taament dem. A tel dem se dem fi lef America gu bak we dem kom fram. Di pikni dem baahn a America. Dem naa nowe fi gu bak tu. Skuul kounsila a fi tek taim wid plenti pikni a chrai mek dem fiil likl beta.

Diistant piipl a wier siefti pin fi shuo se dem a go protek dem wan anada. Siefti pin kyahn stan op gens gon? An di gonman an gonuman dem we no waahn no gon kanchruol, dem did vuot fi Trump. Im difen dem. Wat a sinting! Dis a di griet America! Ongl Maasa Gad kyahn siev America fram dem griet aataklaps.

- Carolyn Cooper, PhD is a specialist on culture and development. Email feedback to columns@gleanerjm.com and karokupa@gmail.com.