Thu | Oct 19, 2017

Carolyn Cooper | Poor people ha fi go dead!

Published:Sunday | February 19, 2017 | 12:00 AM

CHAKA-CHAKA SPELLING

A dat mi housekeeper Annie seh when mi tell her how much fi di lab test weh her son ha fi do: $22,000! She no mek dat fi di whole week. Di pikni dida go a Children's Hospital an she never ha fi pay fi none a di test dem. Dat a up to when im a 12. Last year, im turn 13. Ascorden to Children's Hospital, im a big smaddy now. So dem done wid im.

Im start go a Spanish Town Hospital. Im have kidney problem from im born. An a plenty sufferation di poor lickle pikni go through. Wen im a two month old, dem operate pon im. An a so im an im mada a fight life so til im a go high school now.

Di last time im go hospital, dem gi Annie paper fi tek go a Public fi do sinting fi mek im vein dem open up. Through she ha fi work, she aks her friend fi go get one appointment. Dem tell her seh Annie ha fi come. When she go, dem tell her seh di pikni ha fi come too so dem can look pan im vein before dem gi im appointment fi du wa dem a fi do. So she go back wid him one next day.

Annie work wid mi two day fi di week an dat a did one a fi mi day dem. She go a Public early di morning fi see if she coulda get through an still come a work. Lickle before 11, she call fi seh all now dem no see no doctor. So mi aks her fi mek mi talk to di smaddy weh in charge. She never bodder wid mi. She go talk fi harself.

She tell mi seh di doctor weh fi see di pikni deh inna theatre. If she never go aks, she woulda never find out. Anyhow, one next doctor gi her paper fi go a Apex lab pon Molynes Road fi do di said same test weh dem shoulda do a Public. Im never even look pon di pikni.

DOCTOR CRAB TOE

By dis time, it never mek sense fi Annie bodder come a work. She just go straight a Apex. Dem seh dem no do dat deh test an dem send her to one next Apex pon Winchester Road. Di next week, she go after she lef work. Dem tell her seh dat deh section close 4 o'clock pon Friday.

She go back di next week. Dem tell her seh dem no do dat deh test. She fi go a Oxford Medical. Unu see how much time a waste a go up an dung fi nutten! Not to mention bus fare! Wen mi hear di story, mi tell her seh mi a go call Oxford Medical fi mek sure dem do di test.

Well, wen mi look pon di paper, mi couldn't mek out nutten weh di doctor write. A pure crab toe. Wa mek? Power! Fi mek wi know seh doctor know more dan wi. An wi dis ha fi sop it. Plenty a dem doctor tek Hypocritical Oath, not Hippocratic. Dem love money more dan people. No bodder mek mi start pon dem.

Mi tek picture a di paper an email it to Oxford Medical. Dem know how fi read crab toe. A fi dem bizniz dat. An dem do di test. But koo pon di price! Weh Annie fi get dat deh money? Wi ha fi do plenty better wid health care inna dis ya country.

Pikni age not suppose fi stop a 12. Dat no right. An wi done know seh Govament can't afford fi gi everybody free health care. A pure politics mek dem mash up di system. Who can pay suppose fi pay. An who can't pay suppose fi get help. Poor people can't just dead so fi nutten.

PRAPA-PRAPA SPELIN

A dat mi ouskiipa Annie se wen mi tel ar omoch fi di lab tes we ar son a fi du: $22,000! Shi no mek dat fi di uol wiik! Di pikni dida go a Children's Hospital an she neva a fi pie fi non a di tes dem. Dat a op tu wen im a 12. Laas ier, im ton tortiin. Azkaadn tu Children's Hospital, im a big smadi nou. So dem don wid im.

Im staat go a Spanish Town Hospital. Im av kidni prablem fram im baan. An a plenti sofarieshan di puor likl pikni go chruu. Wen im a tuu mont uol, dem apariet pan im. An a so im an im mada a fait laif so til im a go a ai skuul nou.

Di laas taim im go aaspital, dem gi Annie piepa fi tek go a Public fi du sinting fi mek im vien dem opn op. Chruu shi a fi wok, shi aks ar fren fi go get wan apaintment. Dem tel ar se Annie a fi kom. Wen shi go, dem tel ar se di pikni a fi kom tu so dem kyan luk pan im vien bifuor dem gi im apaintment fi du wa dem a fi du. So shi go bak wid im wan neks die.

Annie wok wid mi tuu die fi di wiik an dat a did wan a fi mi die dem. Shi go a Public orli di maanin fi si if shi kuda get chruu an stil kom a wok. Likl bifuor 11, shi kaal fi se aal nuo dem no si no dakta.So mi aks ar fi mek mi taak tu di smadi we in chaaj. Shi neva bada wid mi. Shi go taak fi arself.

Shi tel mi se di dakta we fi si di pikni de ina tieta. If shi neva go aks, shi wuda neva fain out. Eniou, wan neks dakta gi ar piepa fi go a Apex lab pan Molynes Ruod fi du di sed siem test we dem shuda du a Public. Im neva iivn luk pan di pikni.

DAKTA KRAB TUO

Bai dis taim, it neva mek sens fi Annie bada kom a wok. Shi jos go striet a Apex. Dem se dem no du dat de tes an dem sen a tu wan nex Apex pan Winchester Ruod. Di neks wiik, shi go aafta shi lef wok. Dem tel ar se dat de sekshan kluoz 4 aklak pan Fraide.

Shi go bak di neks wiik. Dem tel ar se dem no du dat de tes. Shi fi go a Oxford Medical. Unu si omoch taim a wies a go op an dong fi notn! Nat tu menshan bos fier! Wen mi ier di stuori, mi tel ar se mi a go kaal Oxford Medical fi mek shuor dem du di tes.

Wel, wen mi luk pan di piepa, mi kudn mek out notn we di dakta rait. A pyuur krab tuo. Wa mek? Powa! Fi mek wi nuo se dakta nuo muor dan wi. An wi dis a fi sop it. Plenti a dem dakta tek Hypocritical Oath, nat Hippocratic. Dem lov moni muor dan piipl. No bada mek mi staat pan dem.

Mi tek pikcha a di piepa an iimiel it tu Oxford Medical. Dem nuo ou fi riid krab tuo. A fi dem bizniz dat. An dem du di test. Bot ku pan di prais! We Annie fi get dat de moni? Wi a fi du plenti beta wid elt kier ina dis ya konchri.

Pikni iej nat sopuoz fi stap a 12. Dat no rait. An wi don nuo se Govament kyaahn afuod fi gi evribadi frii elt kier. A pyuur palitiks mek dem mash op di sistim. Uu kyan pie supuoz fi pie. An uu kyaahn pie supuoz fi get elp. Puor piipl kyaahn jos ded so fi notn.

- Carolyn Cooper is a consultant on culture and development. Email feedback to columns@gleanerjm.com and karokupa@gmail.com.