Fri | Aug 18, 2017

Carolyn Cooper | Never mind yaw, Novelette!

Published:Sunday | April 23, 2017 | 4:00 AM

 

CHAKA-CHAKA SPELLING

 

No teck it personal, mi dear! Di man dem no ready. Dem no waan no woman commissioner. Dem no have di balls fi dat. It look like seh dem fraid woman a go put dem out a commission. Dem done know seh nuff time, di best 'man' fi di job a one woman. An it stick inna dem craw. Dem cyaan tek it. Wi gweh ha fi go wait one long long time fi one woman turn commissioner a police inna disya country.

But yu set di pace an wi proud a yu. A no fi yu fault mek yu no get di work. Yu do everyting yu suppose fi do. Yu go a university. Yu study hard. Yu pass all a yu exam dem. Yu join police force becau yu know eena yu heart a heart seh yu can do di work. Yu understand di system. From top to bottom!

Ongle ting, yu never born wid no baton. Sake a dat, yu can form like seh yu a commissioner. Yu can act good-good. But dem nah gi yu di real-real commissioner work. Wat a piece a liberty! An plenty a di man dem weh born wid baton, dem cyaan do di work good like yu!

Dem tek woman fi eedyat! Dem tink seh dem can fool wi up. An wi no know wa a gwaan. Di lickle acting work nah hold wi. Wi done know how dat go. A consolation prize. A con dem a try con wi. Dem gi yu consolation before dem tek weh di big prize. Dat a after dem done build yu up, mek yu feel seh yu well qualify fi di work. If it fly go a yu head, yu all figet seh yu no got no nightstick. Yu start tink seh yu have a chance.

 

'BET ON NOVELETTE'

 

All Gleaner get ketch! Pon February 19, dem publish one front-page story wid disya big-big headline, 'Bet on Novelette - Acting police commissioner poised to be appointed to lead the force full-time'. A no Caymanas Park wi deh! Dis a no horse race. Dis a police work. Wi no ha fi a bet! Yu well qualify fi di job an yu suppose fi get it. Anyhow, hear wa smaddy tell Gleaner wid dem goat mouth:

"'Ms Grant was appointed to act in the post but it appears that it was a test run and she has passed with flying colours," one source told our news team.

"'She has always enjoyed the respect of her colleagues, but in the time she has been acting she has convinced most persons that she has the mojo for the job.'"

Well, Ms Novelette, yu mighta got 'mojo'. Dat a one African word fi obeah. But still for all, yu no got no baton. An di way di ting set, fi yu obeah cyaan beat di man dem inna disya time. Dem got big stick over yu.

Mi glad fi si seh di woman organisation dem big yu up eena one letter weh Gleaner publish last week Tuesday: 'Women laud Novelette Grant'. Dem seh, "As a woman who is one of the highest-ranking officers in a traditional male-dominated organisation, the JCF, yours is without a doubt a monumental achievement, and we hold you in the highest regard."

A no ongle woman 'laud' yu, Ms Grant. Nuff man wid conscience know seh yu well deserve di commissioner work. Yu coulda more dan manage it. Never mind, yaw! Time longer dan rope.

 

PRAPA-PRAPA SPELIN

 

No tek it porsnal, mi dier! Di man dem no redi. Dem no waahn no uman komishana. Dem no av di baalz fi dat. It luk laik se dem fried uman a go put dem out a komishan. Dem don nuo se nof taim, di bes 'man' fi di jab a wan uman. An it stik ina dem kraa. Dem kyaahn tek it. Wi gwehn a fi go wiet wan lang-lang taim fi wan uman tun komishana a poliis ina disya konchri.

Bot yu set di pies an wi proud a yu. A no fi yu faalt mek yu no get di wok. Yu du evriting yu sopuoz fi du. Yu go a yuunivorsiti. Yu stodi aad. Yu paas aal a yu egzam dem. Yu jain poliis fuors bikaa yu nuo iina yu aat a aat se yu kyahn du di wok. Yu andastan di sistim. Fram tap tu batam!

Ongl ting, yu neva baahn wid no batan. Siek a dat, yu kyahn faam laik se yu a komishana. Yu kyahn ak gud-gud. Bot dem naa gi yu di riil-riil komishana wok. Wat a piis a libati! An plenti a di man dem we baahn wid batan, dem kyaahn du di wok gud laik yu!

Dem tek uman fi iidyat! Dem tingk se dem kyahn fuul wi op. An wi no nuo wa a gwaahn. Di likl aktin wok naa uol wi. Wi don nuo ou dat go. A kansolieshan praiz. A kan dem a chrai kan wi. Dem gi yu kansolieshan bifuor dem tek we di big praiz. Dat a aafta dem don bil yu op, mek yu fiil se yu wel kwalifai fi di wok. If it flai go a yu ed, yu aal figet se yu no gat no naitstik. Yu staat tingk se yu av a chaans.

 

'BET ON NOVELETTE'

 

Aal Gleaner get kech! Pan Febieri 19, dem poblish wan front-piej stuori wid disya big-big edlain, 'Bet on Novelette - Acting police commissioner poised to be appointed to lead the force full time'. A no Caymanas Park wi de! Dis a no aas ries. Dis a polis wok. Wi no a fi a bet! Yu wel kwalifai fi di jab an yu supuoz fi get it. Eniou, ier wa smadi tel Gleaner wid dem guot mout:

"'Ms Grant was appointed to act in the post but it appears that it was a test run and she has passed with flying colours,' one source told our news team.

"'She has always enjoyed the respect of her colleagues, but in the time she has been acting she has convinced most persons that she has the mojo for the job.'"

Wel, Ms Novelette, yu maita gat 'mojo'. Dat a wan Afrikan wod fi uobia. Bot stil far aal, yu no got no batan. An di wie di ting set, fi yu uobia kyaahn biit di man dem ina dis ya taim. Dem gat big stik uova yu.

Mi glad fi si se di uman aaganazieshan dem big yu op iiina wan leta we Gleaner poblish laas wiik Chuuzde: 'Women laud Novelette Grant'.

Dem se, "As a woman who is one of the highest-ranking officers in a traditional male-dominated organisation, the JCF, yours is without a doubt a monumental achievement, and we hold you in the highest regard."

A no ongl uman 'laud' yu, Ms Grant. Nof man wid kanshens nuo se yu wel disorv di komishana wok. Yu kuda muor dan manij it. Neva main, yaa! Taim langa dan ruop.

- Carolyn Cooper, PhD, is a specialist on culture and development. Email feedback to columns@gleanerjm.com and karokupa@gmail.com.