Sat | Dec 16, 2017

Carolyn Cooper | Brand new second-hand Garvey bust

Published:Sunday | September 17, 2017 | 12:00 AM

 

CHAKA-CHAKA SPELLING

 

Mi no wrong Raymond Watson. Im do weh im know how fi do. If yu go pon di Internet an look pon Watson sculpture dem, yu see seh fi im work a weh dem call abstract art. Im no mek no whole heap a people weh look like ordinary people. Dem bend up inna all kind a different, different shape an style.

One a fi im sculpture weh mi love a di one im call 'First Child'. It deh eena Brixton inna England. Di 198 Gallery did gi Watson di work fi mek one sculpture fi member di one hundred an sixteen pikni dem weh di South African govament did kill off eena Soweto pon June 16, 1976.

Watson start off wid one picture weh bruck yu heart. Newspaper all over di world did publish disya picture weh Sam Nzima did tek. One a di Soweto pikni dem, Mbuyisa Makhubo, a carry one next pikni, Hector Pieterson, weh a dead pon im. An Hector sister, Antoinette Sithole, a run side-a dem. She a hold up her hand like seh she a try surrender an stop bullet from fly.

Oonoo fi see wa Raymond Watson do wid dat deh picture! Wen im done bend up di metal, yu feel di sufferation inna yu belly bottom. An yu know, some people never ketch him vision. Lickle after di sculpture put up, dem try fi pop it down. But it never mash up to dat.

Mi no know how Raymond Watson so bad-lucky. A di grace a God mek im first Marcus Garvey bust pon UWI campus never lik down. Di way people did bex bout how it no look nutten laka Garvey! An so fenke-fenke! It did ha fi come down, one way or di other. UWI tek it down di deestant way. An dem gi Watson di chance fi mek over one next bust. An pay im again! Oonoo know how much student wuda glad fi university pay dem fi tek over exam weh dem fail! Aye sah!

 

NO TIE WATSON HAND!

 

Mi did go a di meeting weh Prof Waibinte Wariboko did keep fi mek everybody know how im a go deal wid di bogus bust. Im a di dean a di Faculty of Humanities an Education. An a im did gi Watson di work. Prof Wariboko show di whole a wi di picture a Garvey weh im a gi Watson fi use fi mek over di bust. Well, mi can tell oonoo seh di brand new second-hand Marcus Garvey bust no look nutten laka dat deh picture. An 'Garvey' pop down same way. Im nah seh nutten. Dat deh bust ha fi come down to.

Hear how me tink seh Prof Wariboko shoulda deal wid disya problem. Im fi tell Raymond Watson fi mek one abstract sculpture weh im call 'The Spirit of Marcus Garvey'. Mi know some people a go waan call it 'Marcus Garvey Duppy'. Later fi dem. Mek Raymond Watson tek metal an bend it up an mek it fly up inna di air an mek wi see an feel di power a Marcus Garvey. A dat Watson waan fi du. No tie im hand! An im fi dweet fi free dis time.

Next year, a di 70th anniversary fi UWI. Dem shoulda put up one whole-a Garvey statue fi celebrate all weh im do fi free up wi mind. An dem fi launch a competition fi sculptor all over di world try dem hand fi build di statue. Marcus Garvey did plenty bigger than Jamaica. Im deserve a world-class monument.

 

PRAPA-PRAPA SPELIN

 

Mi no rang Raymond Watson. Im du we im nuo ou fi du. If yu go pan di Intanet an luk pan Watson skolpcha dem, yu si se fi im wok a we dem kaal abschrak aat. Im no mek no uol iip a piipl we luk laik aadineri piipl. Dem ben op iina aal kain a difran, difran shiep an stail.

Wan a fi im skolpcha we mi lov a di wan im kaal 'First Child'. It de iina Brixton ina Ingglan. Di 198 Gallery did gi Watson di wok fi mek wan skolpcha fi memba di wan onjred an sikstiin pikni dem we di South African govament did kil aaf iina Soweto pan Juun 16, 1976.

Watson staat aaf wid wan pikcha we bruk yu aat. Nyuuzpiepa aal uova di worl did poblish disya pikcha we Sam Nzima did tek. Wan a di Soweto pikni dem,Mbuyisa Makhubo, a kyari wan neks pikni, Hector Pieterson, we a ded pan im. An Hector sista, Antoinette Sithole, a ron said-a dem. Shi a uol op ar an laik se shi a chrai sorenda an stap bulit fram flai.

Unu fi si wa Raymond Watson du wid dat de pikcha! Wen im don ben op di metal, yu fiil di sofarieshan ina yu beli batam. An yu nuo, som piipl neva kech im vishan. Likl aafta di skolpcha put op, dem chrai fi pap it dong. Bot it neva mash op tu dat.

Mi no nuo ou Raymond Watson so bad-loki. A di gries a Gad mek im fos Marcus Garvey bos pan UWI kyampos neva lik dong. Di wie piipl did beks bout ou it no luk notn laka Garvey! An so fenke-fenke! It did a fi kom dong, wan wie ar di ada. UWI tek it dong di diistant wie. An dem gi Watson di chaans fi mek uova wan neks bos. An pie im agen! Unu nuo omoch styuudent wuda glad fi yuunivorsiti pie dem fi tek uova egzam we dem fiel! Ai sa!

 

NO TAI WATSON AN!

 

Mi did go a di miitn we Prof Waibinte Wariboko did kip fi mek evribadi nuo ou im a go diil wid di buogos bos. Im a di dean a di Faculty of Humanities an Education. An a im did gi Watson di wok. Prof Wariboko shuo di uol a wi di pikcha a Garvey we im a gi Watson fi yuuz fi mek uova di bos. Wel, mi kyahn tel unu se, di bran nyuu sekan-an Marcus Garvey bos no luk notn laka dat de pikcha. An 'Garvey' pap dong siem wie. Im naa se notn. Dat de bos a fi kom dong tu.

Ier ou mii tingk se Prof Wariboko shuda diil wid disya prablem. Im fi tel Raymond Watson fi mek wan abschrak skolpcha we im kaal 'The Spirit of Marcus Garvey'. Mi nuo som piilp a go waahn kaal it 'Marcus Garvey Duppy. Lieta fi dem. Mek Raymond Watson tek metal an ben it op an mek it flai op ina di ier an mek wi si an fiil di powa a Marcus Garvey. A dat Watson waahn fi du. No tai im an! An im di dwiit fi frii dis taim!

Neks ier a di 70th anivorsori fi UWI. Dem shuda put op wan uola Garvey statyu fi selibriet aal we im du fi frii op wi main. An dem fi laanch a kompitishan fi skolpta aal uova di worl chrai dem an fi bil di statyu. Marcus Garvey did plenti biga dan Jamieka. Im disorv a worl-klaas maniment.

- Carolyn Cooper is a consultant on culture and development. Email feedback to columns@gleanerjm.com and karokupa@gmail.com.