Sun | Dec 16, 2018

Carolyn Cooper | Wa mek Howard Mitchell go tek on UWI?

Published:Sunday | September 23, 2018 | 12:00 AM

 

CHAKA-CHAKA SPELLING

 

Pon September 8, Gleaner publish one article weh Syranno Baines write wid dis ya headline: 'UWI focused on output rather than quality output - PSOJ president'. It sound bad eeh! But wen mi read di article, mi see seh a no Howard Mitchell a seh dat.

Dis a wa im seh: "There is a frustration within the university about the focus on output rather than quality of output." Mitchell seh a di people dem a UWI a fret bout di quality a di graduate dem weh dem same one a put out. If a so, wa mek dem nah do nutten bout it? A who a frustrate who?

Mitchell gwaan an seh: "So I am taking on The UWI and saying that it is not sufficient for you to be producing 300 lawyers. What we going to do with 300 lawyers a year?" But a no UWI one a graduate di whole heap a lawyer dem. Tek, for instance, eena 2017. UWI, Mona, graduate 145 lawyer. An UTech graduate 80. Di two a dem no come up to 300!

Pon top a dat, di head a UTech, Prof Stephen Vasciannie, mek a good point bout quantity eena one article weh publish eena Observer pon Sunday, October 1, 2017, 'UTech and the question of law'. Vasciannie se, "... Law provides openings in the entertainment world, sports, academia, insurance, banking, business planning, politics, media, public policy analysis and implementation, arbitration management, and in many other areas. Thus, when we talk of oversupply, we need to identify the market we have in mind."

 

NUTTEN NO GO SO!

 

Den ascorden to Syranno Baines, "Howard Mitchell has expressed his disappointment with The University of the West Indies (UWI), charging that the institution has failed to build and elevate the business class through research and development." Nutten no go so! Look how much UWI graduate a do good work eena di private sector! Dem build up pon di foundation weh dem did set eena university.

An mi know fi a fact seh UWI sign contract wid di Private Sector Organization of Jamaica (PSOJ) fi work wid dem fi see how di knowledge weh di university a cultivate can help business. Di PSOJ an UWI set up one 'Innovation Committee' weh a deal directly wid dat. Mi no know how come di president a di PSOJ no know wat a gwaan.

Howard Mitchell shoulda tell di two side a di story. Mi nah seh UWI nah no problem. Tek, for instance: Not one faculty a Mona have one woman dean. A pure man a run tings. Dat no good. Still for all, after 70 year, nuff, nuff high-quality graduate come outa UWI. An dem a do all kind a work fi build up dem community - ya so an all over di world. Respect due!

 

PRAPA-PRAPA SPELIN

 

Pon Septemba 8, Gleaner poblish wan aatikl we Syranno Baines rait wid dis ya edlain: 'UWI focused on output rather than quality output - PSOJ president'. It soun bad iihn! Bot wen mi riid di aatikl, mi si se a no Howard Mitchell a se dat.

Dis a wa im se: "There is a frustration within the university about the focus on output rather than quality of output." Mitchell se a di piipl dem a UWI a fret bout di kwaliti a di gradiyet dem we dem siem wan a put out. If a so, wa mek dem naa du notn bout it? A uu a froschriet uu?

Mitchell gwaahn an se: "So I am taking on The UWI and saying that it is not sufficient for you to be producing 300 lawyers. What we going to do with 300 lawyers a year?" Bot a no UWI wan a gradiyiet di uol iip a laaya dem. Tek, far instans iina 2017. UWI, Mona, gradiyiet 145 laaya. An UTech gradiyiet 80. Di tuu a dem no kom op tu 300!

Pan tap a dat, di Ed a UTech, Prof. Stephen Vasciannie, mek a gud paint bout kwantiti iina wan aatikl we poblish iina Observer pan Sonde, Aktuoba 1, 2017, 'UTech and the question of law. Vasciannie se, "Law provides openings in the entertainment world, sports, academia, insurance, banking, business planning, politics, media, public policy analysis and implementation, arbitration management, and in many other areas. Thus, when we talk of oversupply, we need to identify the market we have in mind."

 

NOTN NO GO SO!

 

Den azkaadn tu Syranno Baines, "Howard Mitchell has expressed his disappointment with The University of the West Indies (UWI), charging that the institution has failed to build and elevate the business class through research and development." Notn no go so! Luk omoch UWI gradiyet a du gud wok iina di praivit sekta! Dem bil op pan di foundieshan we dem did set iina yuunivorsiti.

An mi nuo fi a fak se UWI sain kanchrak wid di Private Sector Organization of Jamaica (PSOJ) fi work wid dem fi si ou di nalij we di yuunivorsiti a koltiviet kyahn elp bizniz. Di PSOJ an UWI set op wan 'Innovation Committee' we a diil dairekli wid dat. Mi no nuo ou kom di prezident a di PSOJ no nuo wa a gwaahn.

Howard Mitchell shuda tel di tuu said a di stuori. Mi naa se UWI naa no prablem. Tek, far instans: Nat wan fakolti a Mona av wan uman diin. A pyuur man a ron tingz. Dat no gud. Stil far aal, aafta 70 ier, nof, nof ai-kwaliti gradiyet kom outa UWI. An dem a work fi bil op dem komyuuniti - ya so an aal uova di worl. Rispek juu!

- Carolyn Cooper, PhD, is a specialist on culture and development. Email feedback to columns@gleanerjm.com and karokupa@gmail.com.