Amina Blackwood Meeks
WELL LIKKLE Miss Jing Bing ketch dem now, de whole a dem, de guardians of de morality of de Jamaican masses, all those who would presume to preside over de sensibilities of the stage show massives, and set up demself into a coalition dat exchange monetary support for de keeping of dere laws and orders. Big brain people call dat transactional relationships an likkle brain people just call it prostitution, no lasting values nuh in deh. Well ascarding to JB seet deh now, dem is exposed. At least dem is exposed to she an dat is enough, for she is going to noise it at home an abraad.
First to begin she is starting wit de telephone war. For she tekking it in from a distance. What a debil of a bangarang into de communications market place. If all de phone dem dat advertisement a tell we sey we is to fling into de garbage did have likkle scraps a breath inna dem, Bounti Killa wudda bawl out 'people dead' an de leaders of de coalition wudda call out him name pan dem incitement to riot list. But seet deh now, dem have it into big advertisement sey smaddy must teck a next smaddy phone an fling it into de garbage because it feels good. Well crab is right, what is joke to one is death to another for advertising executive teck dat as a likkle joke but JB teck dat as wilful an malicious destruction of property. It kean wrong when Mass Jabez from Backdeso dweet an funny when it is promoting Missa Jacket an Tie products. JB sey if we serious bout bringing back Jamaica from de brink an returning weself to good attitudes and values it haffe happen across de board. Every likkle action an utterance haffe get scrutinise fe de residual effeck. She tink sey dat fe include into what de
honourable Minista mean when him sey is time fe drastic measures. Odderwise we shall die as poor yah, pauperised in spirit.
FIGHT OVER MONEY
For what is de fight about
really? Inna fe har opinion dem a fight over money. One smaddy want to be de victor and de next one fe end up as de vanquished, in adda words a death is to teck place. While dem a gwaan so now dem a condemn de two likkle yout who ketch a fight Dung Dehso over a likkle hundred dolla bill. But, ascarding to Jing Bang, inna Dung Dehso marketplace de hundred dalla bill kean share neida. One smaddy want fe bling out while de adda smaddy fe end up inna garbage. Coalition fe set example. All dem ton load a money what dem have a teck war meck joke into de media cudda equip couple basic school wid tings to soothe dem spirit from de bangarang what happening round dem, cudda help prevent anadda child fram en up like SashaKay Brown, or give to Edna Manley College fe improve dem Community Drama programme or to JCDC fe expose some more talent dat could be put to better use dan teck war tun into fun and joke.
SEX SELLS
An anyway Jing Bang sey de commercial dem doan even funny. For afta dem ban certain artiste what dem claim violate dem code of morality and what is proper to talk about in certain ways dem full up de commercial dem wid nuttin but sexual innuendos. Dem a try ban people fram sing bout sex chu dem sey we is more dan so-so sex an we mus can find odda tings fe sing bout an dem kean fine nutten but sex fe use fe sell phone. Dem colt de game. So dem can nuh badda come wid no fine point bout what is explicit and what is innuendo. Dem fe come wid what is necessary, what is art an what can lift we brain above de level of we waist.
Somebody colt de game and money is de name of de game. Clyde McKenzie did call it de wheel-an-come-again syndrome. Him did sey it look like sey when certain deejay feel sey de crowd naw rail up fe dem an might tink sey dem outa lyrics dem reach fe some ting fe shock dem, meck dem kean stan dem grung an dem jus haffe jump up an sey wheel an come again?den nuh dat dem a do inna dis communication stage show? Dem a sell phone by de length, a mussi claat, a mus pants length dem a sell for when deejay sell claat by de yaad, which is how claat fe sell, dem fine fault. How dat go? Dem a sell phone by stamina but deejay kean sey him wicked inna bed. JB sey it mus be a case of right hand an leff han naw talk, for de smaddy who sign de code kean be de same smaddy who sign off pan de campaign and de smaddy whe sign de code nuh lissen to de radio, dem only monitor stage show. For a same way de artiste dem sey sem nuh guilty of audience interpretation, dem jus say a ting an audience carry it de distance. Well de phone people dem dun carry it de distance and audience can interpret how dem feel. Dem meck de code and dem bruk de code, de game colt and everybody lose, only money win. Dem is part an parcel of de dehumanising of we an reducing we to so-so money-grabbers.
DOUBLE STANDARDS
If couple yout from Unacceptable address gwaan so police pick dem up. If Acceptable address get killed ova money de park full a jacket-an-tie condemnation an call for code of conduck. Tink yu bad, teck smaddy phone an smash it cause it feels good. Lawsuit ketch yu. Do it a sumfest dem clause yu wid promotion of violence dem colt de game. We want a clause gainst do "any an every" fe money an fame. We want a clause gains incitement to violence into commercials. We want a clause gainst dishonouring hooman into outrageous ways too.
NO JOKING MATTER
Teck for instance JB sey all who kean tun Singer have hooman towel a drap offa har de way she ecstatic sey chu she shop certain place she win fridge an dat sweet delivery man till him pass degrading remarks sey a dat meck him love work fe de place. Dat mean what? De opportunity fe go door to door an see hooman bath towel drap offa dem an expose dem nakedness a fe him fringe benefits? How dat go? Dem colt de game an it nuh funny.
De coalition on decency doan see dat? Or is chu dem only suggest sey de towel drap off an de delivery man see every an any. Den nuh same way de deejay dem sey dem only suggest certain tings dem naw tell nobaddi sey a so it fe go. De coalition nuh see de hooman what run whey leff har husband-to-be at de altar chu she get phone call sey which part she shop give har $60,000. Now dat is a dreadful way to portray hooman, bout when dem nuh have nutten dem want man and as soon as dem have sumpen dem leff him. Plus what kind of manners is dat? People have phone a ring inna funeral, inna school graduation, all inna wedding till advertising people a promote it sey de Bride herself cudden gi de ceremony likkle more attention dan dat. An when time come now dem jump up a wanda how we likkle country ketch a rock bottom. JB calling up de Broadcasting Commission fe check dis out. De principle kean work fe people who come offa a good table an speak in forked tongues but change fe people who nuh have nuh table an kean formulate big wud an code.
A one Jamaica we a defend, one code of conduck, one set of values of attitudes. Who colt de game fe come outa de game, a serious ting we a deal wid now. Into dis here Heritage Week when we a look pan we heritage as a guide to we future we fe promote redemption from every innuendo, time fe de best part a we fe shine. A dat de money fe spen pan.
