Tue | Sep 28, 2021

Carolyn Cooper | Pikni learn dem muma language inna belly

Published:Sunday | February 21, 2021 | 12:19 AM

CHAKA-CHAKA SPELLING

Inna 2013, University of Washington put out one news story wid dis ya headline, ‘While in womb, babies begin learning language from their mothers’. A Dr Molly McElroy write it. She a one scientist weh study nerves. Bot she never like di lab work. So she lef dat an start write bout wa di scientist dem find out. Dat a one good work still. Cau plenty a dem scientist ongle a talk to dem one annoder. Dem nah tell di rest a wi weh dem a do.

Dr McElroy seh “the new study shows that unborn babies are listening to their mothers talk during the last 10 weeks of pregnancy and at birth can demonstrate what they’ve heard”. Seet deh now! Di language weh pikni learn inna dem muma belly a part a dem DNA. Dat deh language mek pikni know who dem be, an who dem come from. It teach dem bout di whole long line a dem fambily! Di belly language a di legacy weh pass dong from generation to generation.

‘LEAVING NO ONE BEHIND’

Today, February 21, United Nations Educational, Scientific and Cultural Organization (UNESCO) a big up muma language all over di world. Dis a wa UNESCO seh: “The theme of the 2021 International Mother Language Day, ‘Fostering multilingualism for inclusion in education and society,’ recognizes that languages and multilingualism can advance inclusion, and the Sustainable Development Goals’ focus on leaving no one behind. UNESCO believes education, based on the first language or mother tongue, must begin from the early years as early childhood care and education is the foundation of learning”.

From 1962 to now, it look like seh not one a fi wi minister a education nuh understand dat. First to begin wid, dem no know seh fi wi Jamaican language a one real-real language. An a dat mek dem nah tek di muma language a nuff pikni serious inna school. Mi know seh one an few pikni inna Jamaica learn English inna fi dem muma belly. But nuff more pikni learn Jamaican.

Govament love talk-talk bout ‘sustainable development’. Dat no mean nutten wen ministry a education a tell pikni seh dem chat bad an dem muma language nah no use. It nuh good fi nutten. A lie! Teacher can use fi wi Jamaican language fi teach English an nuff more language. Pikni belly language a di root a dem consciousness. If teacher try dig it out, di pikni dem nah go develop to dat. Dem nah go learn nutten much inna school. Dem a go get lef. A time Govament stop form di fool. Every pikni inna Jamaica must an bound fi get di chance fi learn inna fi dem muma language. A dem human right.

PRAPA-PRAPA SPELIN

Ina 2013, University of Washington put out wan nyuuz stuori wid dis ya edlain, ‘While in womb, babies begin learning language from their mothers’. A Dr Molly McElroy rait it. Shi a wan saiyantis we stodi norvz. Bot shi neva laik di lab work. So shi lef dat an staat rait bout wa di saiyantis dem fain out. Dat a wan gud work stil. Kaa plenti a dem saiyentis ongl a taak tu dem wan aneda. Dem naa tel di res a wi we dem a du.

Dr McElroy se “the new study shows that unborn babies are listening to their mothers talk during the last 10 weeks of pregnancy and at birth can demonstrate what they’ve heard”. Siit de nou! Di langgwij we pikni lorn ina dem muma beli a paat a dem DNA. Dat de langgwij mek pikni nuo uu dem bi, an uu dem kom fram. It tiich dem bout di uol lang lain a dem fambili! Di beli langgwij a di legisi we paas dong fram jinarieshan tu jinarieshan.

‘LEAVING NO ONE BEHIND’

Tide, Febieri 21, United Nations Educational, Scientific and Cultural Organization (UNESCO) a big op muma langgwij aal uova di worl. Dis a wa UNESCO se: “The theme of the 2021 International Mother Language Day, ‘Fostering multilingualism for inclusion in education and society,’ recognizes that languages and multilingualism can advance inclusion, and the Sustainable Development Goals’ focus on leaving no one behind. UNESCO believes education, based on the first language or mother tongue, must begin from the early years as early childhood care and education is the foundation of learning”.

Fram 1962 tu nou, it luk laik se nat wan a fi wi minista a edikieshan no andastan dat. Fos tu begin wid, dem no nuo se fi wi Jamiekan langgwij a wan riil-riil langgwij. An a dat mek dem naa tek di muma langgwij a nof pikni siiryos ina skuul. Mi nuo se wan an fyuu pikni ina Jamieka lorn Ingglish ina fi dem muma beli. Bot nof muor pikni lorn Jamiekan.

Govament lov taak-taak bout ‘sustainable development’. Dat no miin notn wen minischri a edikieshan a tel pikni se dem chat bad an dem muma langgwij naa no yuus. It no gud fi notn. A lai! Tiicha kyan yuuz fi wi Jamiekan langgwij fi tiich Ingglish an nof muor langgwij. Pikni muma langgwij a di ruut a dem kanshosnis. If tiicha chrai dig it out, di pikni dem naa go divelop tu dat. Dem naa go lorn notn moch ina skuul. Dem a go get lef. A taim Govament stap faam di fuul. Evri pikni ina Jamieka mos an boun fi get di chaans fi lorn ina fi dem muma langgwij. A dem yuuman rait.

For an English translation, visit https://carolynjoycooper.wordpress.com/

 

Carolyn Cooper, PhD, is a specialist on culture and development. Email feedback to columns@gleanerjm.com and karokupa@gmail.com.