Fri | Jun 24, 2022

Carolyn Cooper | Big up PREE an Laura Facey!

Published:Sunday | June 19, 2022 | 12:06 AM

CHAKA-CHAKA SPELLING

Sunday gone, bashment a Ormsby Hall. Inna 1932, one Gleaner ad did call Ormsby “the coolest entertainment hall in Kingston.” It pop down now. It can build up back. Di online literature magazine PREE keep one show wid nine writer. Four a dem under 30: Yashika Graham, Jovanté Anderson, Tanicia Pratt an Kaleb D’Aguilar. Ada Patterson should a di deh but she never come. Di Prince Claus Fund inna di Netherlands gi PREE money fi support young writer. An PREE put on workshop fi dem. All a dem gwaan good-good pon di show.

But mi ha pick out Jovanté Anderson. Hear weh im seh bout tracing: “. . . such an apt word I’ve come to realise to describe the kind of cussing where one not only colourfully sizes up one’s opponent, but their people and their people’s people and their people’s people’s people. A literal tracing that would put any genealogist to shame. No historian could ever recall how Jennifer tiefy-tiefy just like har great-grandfather who fa finger dem did, police did ha fi chop off. No historian could detail how Peter walk an sex off any and everybody like him wukliss muma.” Fi wi tracing tell fambily history.

After di young people dem, five big-time writer tek over di stage: Diana McCaulay, Roland Watson-Grant, Kei Miller, Marlon James an Staceyann Chin. Before Kei read im last poem, im talk bout “all kinds of diseases that have a colour in it, you know, like yellow fever or black plague.” Im seh im shame becau im never ketch it wen wan healer woman, Miss Beatrice, tell im seh she have di bush fi ‘black choob.’ Inna English, dat a ‘blocked tube.’ A same so nuff American turn ‘o’ inna ‘a.’ An oonoo nah laugh after dem. Fi pree di whole a di show, go pon Youtube: https://www.youtube.com/watch?v=0CCdYNpyVFo

NUTTEN NAH GROW

Inna di said same Ormsby Hall, Laura Facey she have one big show. Di art powerful can’t done. She a trace same laka Jovanté generation dem. She call di show, ‘The Laboratory of the Ticking Heart.’ Dat deh name come from one poem weh fi har granny Jullia Rypinski write. An a nuh ongle fi har fambily history one weh Laura a trace. Inna ‘Memorial,’ she show di bruck-heart sufferation weh Jamaica people go through. An wi still a gwaan.

Laura mek some heartical carving bout Cockpit Country. She trace off di bad-breed politician dem deestant-deestant. Dem nuh understand seh Cockpit Country a di heart a Jamaica. Dat a weh nuff-nuff water come from fi di whole a di island. Govament still a sell off di good-good farm land to foreigner fi dig out bauxite. Nutten nah grow inna di poison ground wa lef. Di land a suffer same laka woman wid black choob. Govament better stop form fool an start protect Jamaica future.

PRAPA-PRAPA SPELIN

Sonde gaan, bashment a Ormsby Hall. Ina 1932, wan Gleaner ad did kaal Ormsby “the coolest entertainment hall in Kingston.” It pap dong nou. It kyan bil op bak. Di anlain lichricha magaziin PREE kip wan shuo wid nain raita. Fuor a dem aanda 30: Yashika Graham, Jovanté Anderson, Tanicia Pratt an Kaleb D’Aguilar. Ada Patterson shuda di de bot shi neva kom. Di Prince Claus Fund ina di Nedalanz gi PREE moni fi sopuot yong raita. An PREE put aan workshap fi dem. Aal a dem gwaan gud-gud pan di shuo.

Bot mi a fi pik out Jovanté Anderson. Ier we im se bout chriesn: “. . . such an apt word I’ve come to realise to describe the kind of cussing where one not only colourfully sizes up one’s opponent, but their people and their people’s people and their people’s people’s people. A literal tracing that would put any genealogist to shame. No historian could ever recall how Jennifer tiefy-tiefy just like har great-grandfather who fa finger dem did, police did ha fi chop off. No historian could detail how Peter walk an sex off any and everybody like him wukliss muma.” Fi wi chriesn tel fambili ischri.

Aafta di yong piiipl dem, faiv big-taim raita tek uova di stiej: Diana McCaulay, Roland Watson-Grant, Kei Miller, Marlon James an Staceyann Chin. Bifuor Kei riid im laas pouwem, im taak bout “all kinds of diseases that have a colour in it, you know, like yellow fever or black plague.” Im se im shiem bikaa im neva kech it wen wan iila uman, Mis Beatrice, tel im se shi av di bush fi ‘blak chuub.’ Ina Ingglish, dat a ‘blocked tube.’ A siem so nof Amerikan ton ‘o’ ina ‘a.’ An unu naa laaf aafa dem. Fi prii di uol a di shuo, go pan Youtube:

https://www.youtube.com/watch?v=0CCdYNpyVFo

NOTN NAA GRUO

Ina di sed siem Ormsby Hall, Laura Facey shii av wan big shuo. Di aat powaful kyaahn don. Shi a chries siem laka Jovanté jinarieshan dem. Shi kaal di shuo, ‘The Laboratory of the Ticking Heart.’ Dat de niem kom fram wan pouwem we fi ar grani, Jullia Rypinski rait. An a no ongl fi ar fambili ischri wan we Laura a chries. Ina ‘Memorial,’ shi shuo di brok-aat sofarieshan we Jamieka piipl go chruu. An wi stil a gwaan.

Laura mek som aatikal kyaavin bout Kakpit Konchri. Shi chries aaf di bad-briid palitishan dem diistant-diistant. Dem no andastan se Kakpit Konchri a di aat a Jamieka. Dat a we nof-nof waata kom fram fi di uol a di ailan. Govament stil a sel aaf di gud-gud faam lan tu farina fi dig out baksait. Notn naa gruo ina di paizn grong wa lef. Di lan a sofa siem laka uman wid blak chuub. Govament beta stap faam fuul an staat protek Jamieka fyuucha.

For an English translation, visit https://carolynjoycooper.wordpress.com

- Carolyn Cooper, PhD, is a teacher of English language and literature and a specialist on culture and development. Email feedback to columns@gleanerjm.com and karokupa@gmail.com.