Thu | Dec 1, 2022

Carolyn Cooper | Wa Warmington know bout Mark Golding generation?

Published:Sunday | November 20, 2022 | 12:07 AM

CHAKA-CHAKA SPELLING

It look like seh Everald Warmington nuh know nutten bout Mark puppa, John Golding. Im a nuh bakra massa. Im a bakra, yes. Dat nuh mean seh im a massa. Bakra a one dem word inna fi wi Jamaican language weh come straight from Africa. Ascorden to di Dictionary of Jamaican English, ‘backra’ or ‘buckra’ come from two language inna Nigeria: Ibo an Efik. Fi dem word ‘mbakara’ mean “white man, he who surrounds or governs.”

Seet deh now! A same so nuff a wi tink seh bakra mek fi rule wi. A dat mek di King a England a di head a fi wi country. An wi still a go a fi dem Privy Council fi mek dem pass judgement pon wi. A time fi dat done. Yu see dem bakra from England weh did go all bout – north, south, east an west – seh dem a “rule the waves”! Fi dem ship sink. Same lakka di Titanic. An dem cyaan even rule demself, much more “the waves.” Look how much prime minister dem have dis ya year! Three! An dem end up wid one Indian. Nuff, nuff, nuff a dem bex so til. A long time Miss Lou did tell dem how it wuda go: “Colonization In Reverse.”

‘FOREVER THANKFUL’

John Golding never come a Jamaica fi turn bakra massa over wi. Im come fi serve wi. Im did study orthopaedics. Dat a one a dem English word weh come from Greek. Di ortho part mean straighten and paedics stand fi pikni. Orthopaedics deal wid how yu body move. An a no ongle pikni body. Everybody! Six month after John Golding come ya inna 1953 fi teach a UC, polio bruck out. Bout 1,500 smaddy ketch it. It cripple dem. Golding set up one programme fi help dem ketch up back demself. Inna 1957, one hell of a train crash a Kendal! Bout 200 smaddy dead an more than 700 a dem bruck hand, foot, all part a dem body. A John Golding help nuff a dem get better.

Inna 2016, Mark Golding post one picture a im puppa pon FaceBook. Yu kuda see how im proud a im: “My Late Father, Professor the Hon. Sir John Golding, Jamaica’s first orthopaedic surgeon and founder of the Mona Rehabilitation Centre (Now the Sir John Golding Rehabilitation Centre).” Ivy Romeo-Brown post, “That’s your Dad!!! Well!!!! He caused my second son to be able to wear a pair of shoes!! Not specially built!!! So you have another like!! Meaning he fixed some mal-formed toes!!”

Patricia Curniffe Cole post, “Your dad performed surgery to remove my dad leg after a motor vehicle accident more than 65 years ago. my dad also benefitted from Mona Rehab. My family is forever thankful!!!” Nuff-nuff a wi glad fi di whole heap a work weh John Golding did do fi mek life better fi so much a wi. It nuh matter seh im never born ya. An im pikni, Mark, weh born ya, a try im best fi do inna politics weh im puppa did do inna medicine: healing a di nation.

PRAPA-PRAPA SPELIN

It luk laik se Everald Warmington no nuo notn bout Mark pupa, John Golding. Im a no bakra maasa. Im a bakra, yes. Dat no miin se im a maasa. Bakra a wan dem word ina fi wi Jamiekan langgwij we kom schriet fram Afrika. Azkaadn tu di Dictionary of Jamaican English, ‘backra’ ar ‘buckra’ kom fram tuu langwij ina Naijiiriya: Ibo an Efik. Fi dem word ‘mbakara’ miin “white man, he who surrounds or governs.”

Siit de nou! A siem so nof a wi tingk se bakra mek fi ruul wi. A dat mek di King a Ingglan a di ed a fi wi konchri. An wi stil a go a fi dem Privy Council fi mek dem paas jojment pan wi. A taim fi dat don. Yu si dem bakra fram Ingglan we did go aal bout – naat, sout, iis an wes – se dem a “rule the waves”! Fi dem ship sink. Siem laka di Titanic. An dem kyaahn iivn ruul demself, moch muor “the waves.” Luk omoch praim minista dem av dis ya ier! Chrii! An dem en op wid wan Indyan. Nof, nof, nof, a dem beks so til. A lang taim Miss Lou did tel dem ou it wuda go: “Colonization In Reverse.”

‘FOREVER THANKFUL’

John Golding neva kom a Jamieka fi ton bakra maasa uova wi. Im kom fi sorv wi. Im did stodi orthopaedics. Dat a wan a dem Ingglish word we kom fram Griik. Di ortho paat miin straighten and paedics stan fi pikni. Orthopaedics diil wid ou yu badi muuv. An a no ongl pikni badi. Evribadi! Siks mont aafta John Golding kom ya ina 1953 fi tiich a UC, puolyo bruk out. Bout 1,500 smadi kech it. It kripl dem. Golding set op wan pruogram fi elp dem kech op bak demself. Ina 1957, wan el ev a chrien krash a Kendal! Bout 200 smadi ded an muor dan 700 a dem bruk an, fut, aal paat a dem badi. A John Golding elp nof a dem get beta.

Ina 2016, Mark Golding puos wan pikcha a im pupa pan FaceBook. Yu kuda si ou im proud a im: “My Late Father, Professor the Hon. Sir John Golding, Jamaica’s first orthopaedic surgeon and founder of the Mona Rehabilitation Centre (Now the Sir John Golding Rehabilitation Centre).” Ivy Romeo-Brown puos, “That’s your Dad!!! Well!!!! He caused my second son to be able to wear a pair of shoes!! Not specially built!!! So you have another like!! Meaning he fixed some mal-formed toes!!”

Patricia Curniffe Cole puos, “Your dad performed surgery to remove my dad leg after a motor vehicle accident more than 65 years ago. my dad also benefitted from Mona Rehab. My family is forever thankful!!!” Nof-nof a wi glad fi di uol iip a work we John Golding did du fi mek laif beta fi so moch a wi. It no mata se im neva baan ya. An im pikni, Mark, we baan ya, a chrai im bes fi du ina palitiks we im pupa did du ina medisn: iilin a di nieshan.

For an English translation, visit https://carolynjoycooper.wordpress.com/

- Carolyn Cooper, PhD, is a teacher of English language and literature and a specialist on culture and development. Email feedback to columns@gleanerjm.com and karokupa@gmail.com.