Carolyn Cooper | Juliet Holness a follow back a Marisa

CHAKA-CHAKA SPELLING

Look how Marisa Dalrymple-Philibert she did gwaan wen di Integrity Commission (IC) did report her to parliament! From 2015 to 2020, she did figet bout fi her big car wen she did a add up all a wa shi own. She did waa turn judge over fi her owna case. An wen di Opposition try aks her question bout di report, she shut dem up. An dem walk out a parliament.

After dat, Dalrymple-Philibert did aks di Attorney-General (AG) fi advise parliament bout how dem fi deal wid di report dem from di IC. She did ha fi resign before di AG advice come back. Di new Speaker, Madame Juliet Holness, get di AG answer. An she nah mek di whole a parliament know wa it seh same time. She a send it to ongle certain committee. An she nah listen to di Opposition wen dem a seh dat nuh right. Shi a follow back a Dalrymple-Philibert.

Wa mek it worse, di Govament MP dem a defend Holness gainst di Opposition. Ascorden to one Gleaner report, “Holness doubles down,” weh come out Wednesday gone, dis a wa Delroy Chuck, di Justice minister, seh: “‘The attorney general is the lawyer for the Government, not for the Parliament. If the Speaker asks for an opinion from an attorney – doesn’t even have to be the attorney general – it’s a matter for the Speaker whether the Speaker wants to share with the House . . . . If the Speaker does not provide it, that’s the end of the matter,’ he repeatedly said.” Wa kind a justice dat?

DAT NUH MEK NO SENSE

Mi ha fi admit seh Marisa Dalrymple-Philibert, Juliet Holness an Delroy Chuck couldn’t gwaan like dat inna di UK parliament. Fi dem Speaker of the House nuh partial. Ascorden to Wikipedia, “By convention, the Speaker is strictly non-partisan; accordingly, a Speaker is expected to renounce all affiliation with their former political parties when taking office and afterwards.” Pon top a dat, di Speaker ha fi mek sure seh di Opposition get di chance fi talk dem mind inna parliament.

A long time now wi fi bruck weh from di UK an turn republic. Wi cyaan gwaan like seh wi ‘independent’ an wi still a heng on pon King Charles seh im a di head a fi wi country. Dat nuh mek no sense. Still for all, if wi did a follow back a di UK parliament, wi wouldn’t have so much trouble wid fi wi partial Speaker dem. Wi ha fi know wa fi tek from di UK an wa fi left. Every fish inna sea a nuh shark. An nuff shark deh pon dry land.

PRAPA-PRAPA SPELIN

Luk ou Marisa Dalrymple-Philibert shii did gwaan wen di Integrity Commission (IC) did ripuout ar tu paaliment! Fram 2015 tu 2020, shi did figet bout fi ar big kyar wen shi did a ad op aal a wa shi uon. Shi did waahn ton joj uova fi ar uona kies. An wen di Opposition chrai aks ar kweschan bout di ripuot, shi shut dem op. An dem waak out a paaliment.

Aafta dat, Dalrymple-Philibert did aks di Attorney-General (AG) fi advaiz paaliment bout ou dem fi diil wid di ripuot dem fram di Integrity Commission. Shi did a fi rizain bifuor di AG advais kom bak. Di nyuu Speaker, Madame Juliet Holness, get di AG ansa. An shi naa mek di uola paaliment nuo wa it se siem taim. Shi a sen it tu ongl sortn komiti. An shi naa lisn tu di Opposition wen dem a se dat no rait. Shi a fala bak a Dalrymple-Philibert.

Wa mek it wors, di Govament MP dem a difen Holness gens di Opposition. Azkaadn tu wan Gleaner ripuot, “Holness doubles down,” we kom out Wenzde gaan, dis a wa Delroy Chuck, di Jostis minista, se: “‘The attorney general is the lawyer for the Government, not for the Parliament. If the Speaker asks for an opinion from an attorney – doesn’t even have to be the attorney general – it’s a matter for the Speaker whether the Speaker wants to share with the House . . . . If the Speaker does not provide it, that’s the end of the matter,’ he repeatedly said.” Wa kain a jostis dat?

DAT NO MEK NO SENS

Mi a fi admit se Marisa Dalrymple-Philibert, Juliet Holness an Delroy Chuck kudn gwaan laik dat ina di UK paaliment. Fi dem Speaker of the House no paashal. Azkaadn tu Wikipedia, “By convention, the Speaker is strictly non-partisan; accordingly, a Speaker is expected to renounce all affiliation with their former political parties when taking office and afterwards.” Pan tap a dat, di Speaker a fi mek shuor se di Opposition get di chaans fi taak dem main ina paaliment.

A lang taim nou wi fi brok we fram di UK an ton ripoblik. Wi kyaahn gwaan laik se wi ‘indipendent’ an wi stil a eng aan pan King Charles se im a di ed a fi wi konchri. Dat no mek no sens. Stil far aal, if wi did a fala bak a di UK paaliment, wi wudn av so moch chrobl wid fi wi paashal Speaker dem. Wi a fi nuo wa fi tek fram di UK an wa fi lef. Evri fish ina sii a no shaak. An nof shaak de pan jrai lan.

For an English translation, visit carolynjoycooper.wordpress.com

Carolyn Cooper, PhD, is a teacher of English language and literature and a specialist on culture and development. Send feedback to columns@gleanerjm.com and karokupa@gmail.com