Thu | Jun 24, 2021

High time fi woman bishop

Published:Sunday | July 20, 2014 | 12:00 AM

CHAKA-CHAKA SPELLING

Look how long woman a run Church a Jamaica! An it tek 2,000 year an more fi di Anglican dem inna England decide dem mind fi mek woman turn bishop. Wat a sinting! An some a di man dem - an all woman, too - bex, bex, bex.

Di bishop dem claims seh dem a tan up inna one long, long line weh go right back to Jesus an im 12 disciple. From man to man come down. Dem call it 'apostolic succession'. Dem seh Jesus never have no woman disciple. A so-so man. So a man fi run tings inna di church. Woman no business fi waan turn no bishop. Unu tink it easy?

Di Anglican Church do have woman bishop inna odder country laka Australia, New Zealand, Canada, Merica an Swaziland. But no inna England. Dem a hold on pon ole-time sinting. Some a di man priest dem so harden, dem seh if a no man bishop ordain dem, dem no ordain fi true. Wat a way dem backward! Mi sorry fi dem.

WOMAN LUCK

Tings an times a change. An all who naa change a go get lef. Anyhow, it look like seh di one dem weh waan bring een di woman bishop dem a try see wid dem odder one weh no ready. Dem no waan di Church mash up. So hear wa dem a go do. All who no waan no woman bishop can aks fi one man.

Mi no know how dem a go manage if half a dem waan man an di next half waan woman. Dem mussi a go end up wid two bishop inna di one district weh dem call 'diocese'. Then mek mi gi unu lickle joke. Di word bishop come from Greek: episkopos. Di epi part mean pon top; an skopos mean fi look. So bishop a overseer.

See ya! We done know bout overseer. A no nice sinting fi a beat people fi work out dem soul case fi nutten. But dem ya holy-holy overseer supposen fi a look after wi soul an wi soul case. So wat happen to woman soul an soul case? Wi a no smaddy? Wa mek wi cyaan oversee fi wi owna soul an case? An fi di man dem to? Wa mek a ongle man can oversee?

Then through di Anglican Church a di official church a England, di woman-bishop vote ha fi go a Parliament. An if it pass deh so, then di woman dem gone clear. An member seh it never easy fi woman turn priest. A no til 1994 dem ordain di first woman priest dem. Mi no understand wa mek it so hard fi Christian see seh man an woman supposen fi have di said same rights.

Old-time people seh, 'Woman luck deh a dungle heap; fowl cratch i out'. Dat simple mean seh good luck can drop pon woman anywhere. All inna dungle. Mi naa seh Anglican Church a dungle. Mi no waan no overseer beat out mi soul case. But it look like seh nuff cratch-cratch a gwaan inna dat deh Chuch fi root out some a di man dem an mek space fi woman. After all!

PRAPA-PRAPA SPELIN

Luk ou lang uman a ron choch a Jamieka! An it tek tuu touzn ier an muor fi di Anglikan dem ina Inglan disaid dem main fi mek uman ton bishop. Wat a sinting! An som a di man dem - an aal uman tu - beks, beks, beks.

Di bishop dem kliemz se dem a tan op ina wan lang, lang lain we go rait bak tu Jiizas an im twelv disaipl. Fram man tu man kom dong. Dem kaal it 'apostolic succession'. Dem se Jiizas neva av no uman disaipl. A suo-so man. So a man fi ron tingz ina di Choch. Uman no bizniz fi waahn ton no bishop. Unu tingk it iizi?

Di Anglikan Choch duu av uman bishop ina som ada konchri laka Aaschrielya, Nyuu Ziilan, Kyanada, Merika an Swaazilan. Bot no ina Inglan. Dem a uol aan pan uol-taim sinting. Som a di man priis dem so aadn, dem se if a no man bishop aadien dem, dem no aadien fi chruu. Wat a wie dem bakwod! Mi sari fi dem.

UMAN LOK

Tingz an taimz a chienj. An aal uu naa chienj a go get lef. Eni-ou it luk laik se di wan dem we waahn bring iin di uman bishop dem a chrai si wid dem ada wan we no redi. Dem no waahn di Choch mash op. So ier wa dem a go du. Aal uu no waahn no uman bishop kyan aks fi wan man.

Mi no nuo ou dem a go manij ef aaf a dem waahn man an di neks aaf waahn uman. Dem mosi a go en op wid tuu bishop ina di wan dischrik we dem kaal 'diocese'. Den mek mi gi unu likl juok. Di wod 'bishop' kom fram Griik: episkopos. Di epi paat miin pan tap; an skopos miin fi luk. So bishop a uovasiya!

Si ya! Wii don nuo bout uovasiya. A no nais sinting fi a biit piipl fi wok out dem suol kies fi notn. Bot dem ya uoli-uoli uovasiya sopuozn fi a luk aafta wi suol an wi suol kies. So wat apn tu uman suol an suol kies? Wi a no smadi? Wa mek wi kyaahn uovasi fi wi uona suol an kies? An fi di man dem tu? Wa mek a ongl man kyan uovasi?

Den chruu di Anglikan Choch a di ofishal Choch a Inglan, di uman-bishop vuot a fi go a Paaliment. An if it paas de so, den di uman dem gaan klier. An memba se it neva iizi fi uman ton priis. A no til 1994 dem aadien di fos uman priis dem. Mi no andastan wa mek it so aad fi Krischan si se man an uman supuozn fi av di sed siem raits.

Uol-taim piipl se, 'Uman lok de a dongl iip; foul krach i out'. Dat simpl miin se gud lok kyan jrap pan uman eniwe. Aal ina dongl. Mi naa se Anglikan Choch a dongl. Mi no waahn no uovasiya biit out mi soul kies. Bot it luk laik se nof krach-krach a gwaan ina dat de Choch fi ruut out som a di man dem an mek spies fi uman. Aafta raal!

Carolyn Cooper is a teacher of English language and literature. Visit her bilingual blog at http://carolynjoycooper.wordpress.com. Email feedback to columns@gleanerjm.com and karokupa@gmail.com.