Wed | Sep 20, 2017

Carolyn Cooper | JLP no own prosperity!

Published:Sunday | December 18, 2016 | 12:03 AM

 

CHAKA-CHAKA SPELLING

 

Di Leader a di Opposition, Portia Simpson Miller, have every right fi oppose di name a di "Partnership for a Prosperous Jamaica." Di partnership not suppose fi big up ongle one party. It no fi partial. All a di party dem inna di partnership shoulda understand dat: Govament, Opposition, di Private Sector Organisation a Jamaica (PSOJ) an all a di organisation dem weh a look out fi di best interest a di country.

So wa mek Prime Minister Andrew Holness go shoob een 'Prosperous' inna di name a di partnership? An when di Leader a di Opposition send im letter bout it, im no pay her bad mind! Dog an all know seh 'prosperity' a di JLP slogan. It big an broad pon dem website, "Partnership For Prosperity". One green bell inna di miggle a di 'o' inna 'Prosperity'.

 

GLEANER A MEK EXCUSE

 

Nutten never wrong wid di old name, "Partnership for Jamaica". But no! A 'prosperity' time now. Mi surprise fi see Gleaner a mek excuse fi Andrew Holness. Look weh last Thursday editorial seh: "... the administration, inadvertently perhaps, added an element of the slogan from its recent election campaigns to the forum at which the government, opposition, the private sector, the labour movement and civil society groups trash out national development".

"Inadvertently perhaps?" Suppose Gleaner never use dat deh big wod 'inadvertently'. Suppose dem did seh 'accidentally'. Who woulda tek dem serious? Not a single soul! Di labourite dem woulda laugh after Gleaner an seh, "Accident? Fi wi leader no do nutten by accident. Im directly put een 'prosperous' fi mek everybody know seh a we run tings". An di comrade dem woulda dis kiss dem teet an seh, "Accidentally pon purpose".

 

'SUBLIMINAL MESSAGING'

 

Gleaner admit seh "politics plays on symbols and subliminal messaging". But hear weh Gleaner gwaan an seh: ". . . so it is not surprising that Mrs Simpson Miller and her party noticed and read political motive on the part of the government, even if that may not have been its intent". Seet deh! Accident again! Gleaner really waan wi believe seh 'perhaps' Andrew Holness never conscious a weh im a do when im put een 'prosperous' inna di name a di partnership? No sah!

Di Prime Minister shoulda pay attention to weh im a do an stop get inna accident. Im fi tek out di 'prosperous' outa di name a di partnership. An di PSOJ president, Paul Scott, shoulda apologise to Mrs. Simpson Miller fi seh she 'irresponsible' becau she never sign di partial agreement. A Andrew Holness 'irresponsible'.

Still for all, mi no tink di PNP shoulda mek di JLP capture 'prosperity'. Way back inna 2003, Prime Minister P.J. Patterson did a defend 'prosperity'. Im call di 2003-2004 budget, "Creating A Partnership for Prosperity". Inna dis ya time, JLP an PNP ha fi come together wid intention fi try mek life better fi di whole a Jamaica. Wi ha fi done di tribal war. A ongle so wi a go able fi prosper fi true.

 

PRAPA-PRAPA SPELIN

 

Di Liida a di Apazishan, Portia Simpson Miller, av evri rait fi opuoz di niem a di "Partnership for a Prosperous Jamaica." Di paatnaship nat supuoz fi big op ongl wan paati. It no fi paashal. Aal a di paati dem iina di paatnaship shuda andastan dat: Govament, Apazishan, di Praivit Sekta Aaganizieshan a Jamieka (PSAJ) an aal a di aaganizieshan dem we a luk out fi di bes inchres a di konchri.

So wa mek Praim Minista Andrew Holness go shub iin 'Prosperous' iina di niem a di paatnaship? An wen di Liida a di Apazishan sen im leta bout it, im no pie ar bad main! Daag an aal nuo se 'prosperity' a di JLP sluogan. It big an braad pan dem websait, "Partnership For Prosperity". Wan griin bel iina di migl a di 'o' iina 'Prosperity'.

 

GLEANER A MEK EKSKYUUZ

 

Notn neva rang wid di uol niem, "Partnership for Jamaica". Bot nuo! A 'prosperity' taim nou. Mi sopraiz fi si Gleaner a mek ekskyuuz fi Andrew Holness. Luk we laas Torsde edituoriyal se: ". . . the administration, inadvertently perhaps, added an element of the slogan from its recent election campaigns to the forum at which the government, opposition, the private sector, the labour movement and civil society groups trash out national development".

"Inadvertently perhaps"? Sopuoz Gleaner neva yuuz dat de big wod 'inadvertently'. Supuoz dem did se 'accidentally'. Uu wuda tek dem siiryos? Nat a singl suol. Di liebarait dem wuda laaf aafta Gleaner an se, "Aksident? Fi wi liida no du notn bai aksident. Im dairekli put iin 'prosperous' fi mek evribadi nuo se a wii ron tingz". An di komred dem uda dis kis dem tiit an se, "Aksidentali pan porpos".

 

'SUBLIMINAL MESSAGING'

 

Gleaner admit se "politics plays on symbols and subliminal messaging". Bot ier we Gleaner gwaahn an se: ". . . so it is not surprising that Mrs Simpson Miller and her party noticed and read political motive on the part of the government, even if that may not have been its intent". Siit de! 'Aksident' again! Gleaner rieli waahn wi biliiv se 'perhaps' Andrew Holness neva kanshos a we im a du wen im put iin 'prosperous' iina di niem a di paatnaship? Nuo sa!

Di Praim Minista shulda pie atenshan tu we im a du an stap get ina aksident. Im fi tek out di 'prosperous' outa di niem a di paatnaship. An di PSAJ president, Paul Scott, shuda apalajaiz tu Mrs. Simpson Miller fi se shi 'irresponsible' bikaa shi neva sain di paashal agriiment. A Andrew Holness 'irresponsible'.

Stil far aal, mi no tingk di PNP shuda mek di JLP tek we 'prosperity' fram dem. Wie bak iina 2003, Praim Minista P.J. Patterson did a difen 'prosperity'. Im kaal di 2003-2004 bojit, "Creating A Partnership for Prosperity". Ina dis ya taim, JLP an PNP a fi kom tugeda wid intenshan fi chrai mek laif beta fi di uol a Jamieka. Wi a fi don di traibal waar. A ongl so wi a go iebl fi praaspa fi chruu.

- Carolyn Cooper is, PhD is a specialist on culture and development. Email feedback to columns@gleanerjm.com and karokupa@gmail.com.