Thu | Apr 26, 2018

Carolyn Cooper | Two crocodile, one belly

Published:Sunday | March 18, 2018 | 12:00 AM

 

CHAKA-CHAKA SPELLING

 

Di Akan people dem eena Ghana got nuff Adinkra picture weh dem draw fi show fi dem philosophy. All like Sankofa. Dat a one bird wid one egg eena di mout an di head turn backways. Dat miin se yu no fi figet weh yu a come from. Sometime no egg no deh. One next Sankofa a one curly-curly heart, weh go round an come round. Sometime it no got no tail weh come round. Dat deh heart deh pon nuff window an door grille eena Jamaica. Plenty a wi no know seh a fi wi Adinkra picture.

Nuff a fi wi old-time people dem did come from Ghana. But wi nah turn wi head backways fi member di philosophy weh dem did teach wi. It fly outa wi head. Di Reparation Research Centre weh set up a University of the West Indies, dem tek di Sankofa bird fi fi dem logo. Dat mean seh di centre a go do nuff work fi mek sure seh wi no figet bout wi history an di sufferation weh wi long-time people dem go through eena slavery days. An wi ha fi demands reparation from all who a live big life offa wi old-time people dem blood, sweat an eye water.

A no ongle suffer wi did suffer. Wi did mek life ya so. Wi sing King Alpha song in a strange land. Wi tell story an gi joke fi keep up wi courage. Wi plant food an sell an mek money fi all buy wi self outa slavery. An wi walk wid wi owna religion from Africa. Wi done know seh dem odder one weh cross over eena di duppy world, fi dem spirit still deh ya mongst wi a protect wi. Same like di angel dem eena Bible. Still for all, wi cyaahn gi up di fight fi reparation.

 

PROSPERITY FI DI BANK DEM

 

One nex serious Adinkra picture a two crocodile wid one belly. Dem fight over food all di time. Dem nah see seh it no matter which one a dem nyam di food, di two a dem belly a go full same way. Dat deh picture show wi seh wi fi stop fight gainst wi one anodder. Wi fi live good. Wi figet bout dat eena Jamaica. Wi too craven. Then it come to mi seh eena dis ya time, JLP an PNP a di two crocodile. A time di politician dem eena di two party stop full up fi dem belly an start use dem head fi see how dem coulda mek life better fi poor people eena dis ya country.

Look pon di crosses wid di tiefin bank dem! Dem just a dig out wi eye. Di whole a dem tan bad wid dem wicked bank charge. Mi couldn't believe it wen mi hear seh Scotiabank dida charge 385 dollar fi swop 5,000 dala bil fi di lickler one dem. Pressure drop pon Scotia an dem stop dweet. All di buildng society dem weh suppose fi a build up dem member, dem a raise up fi dem charge same way.

Last month, Parliament vote pon one bill fi control di bank dem. Twenty-nine a di MP dem seh 'yes'. Dem a PNP. An thirty a dem so worthless, dem seh 'no'. Dem a JLP. Dem a difen prosperity fi di bank dem. An Audley Shaw im bite Peter Phillips seh im "making it look like this side not interested in consumer affairs; that we not interested in the customers of banks and other financial institutions". Mi no know if Peter did bite im back. Di way me seet, di two crocodile dem a fatten dem one big belly offa poor people.

 

PRAPA-PRAPA SPELIN

 

Di Akan piipl dem iina Ghana gat nof Adinkra pikcha we dem jraa fi shuo fi dem filasafi. Aal laik Sankofa. Dat a wan bord wid wan eg iina di mout an di ed ton bakwiez. Dat miin se yu no fi figet weh yu a kom fram. Somtaim no eg no de. Wan neks Sankofa a wan korli-korli aat, we go roun an kom roun. Somtaim it no gat no tiel we kom roun. Dat de aat de pan nof winda an duor gril iina Jamieka. Plenti a wi no nuo se a fi wi Adinkra pikcha.

Nof a fi wi uol taim piipl dem did kom fram Ghana. Bot wi naa ton wi ed bakwiez fi memba di filasafi we dem did tiich wi. It flai outa wi ed. Di Reparation Research Centre we set op a University of the West Indies, dem tek di Sankofa bord fi fi dem luogo. Dat miin se di Centre a go du nof wok fi mek shuor se wi no figet bout wi ischri an di sofarieshan we wi lang-taim piipl dem go chruu iina slievri diez. An wi a fi dimaans riparieshan fram aal uu a liv big laif aafa wi uol-taim piipl dem blod, swet an yai waata.

A no ongl sofa wi did sofa. Wi did mek laif ya so. Wi sing King Alpha sang in a schrienj lan. Wi tel stuori an gi juok fi kip op wi korij. Wi plaant fuud an sel an mek moni fi aal bai wi self outa slievri. An wi waak wid wi uona rilijan fram Afrika. Wi don nuo se dem ada wan we kraaz uova iina di dopi worl, fi dem spirit stil de ya mongs wi a protek wi. Siem laik di ienjel dem iina Baibl. Stil far aal, wi kyaahn gi op di fait fi riparieshan.

 

PROSPERITI FI DI BANGK DEM

 

Wan neks siiryos Adinkra pikcha a tuu krokodail wid wan beli. Dem fait uova fuud aal di taim. Dem naa si se it no mata wich wan a dem nyam di fuud, di tuu a dem beli a go ful siem wie. Dat pikcha shuo wi se wi fi stap fait gens wi wan aneda. Wi fi liv gud. Wi figet bout dat iina Jamieka. Wi tuu krievn. Den it kom tu mi se iina dis ya taim, JLP an PNP a di tuu krokodail. A taim di palitishan dem iina di tuu paati stap ful op fi dem beli an staat yuuz dem ed fi si ou dem kuda mek laif beta fi puor piipl iina dis ya konchri.

Luk pan di kraasiz wid di tiifin bangk dem! Dem jos a dig out wi yai. Di uol a dem tan bad wid dem wikid bangk chaaj. Mi kudn biliiv it wen mi ier se Scotiabank dida chaaj 385 dala fi swap 5,000 dala bil fi di likla wan dem. Presha jrap pan Scotia an dem stap dwiit. Aal di bildin sosaiyati dem we supuoz fi a bil op dem memba, dem a riez op fi dem chaaj siem wie.

Laas mont, Paaliment vuot pan wan bil fi kanchruol di bangk dem. Twenti-nain a di MP dem se 'yes'. Dem a PNP. An toti a dem so wotlis, dem se 'no'. Dem a JLP. Dem a difen praasperiti fi di bangk dem. An Audley Shaw im bait Peter Phillips se im "making it look like this side not interested in consumer affairs; that we not interested in the customers of banks and other financial institutions". Mi no nuo if Peter did bait im bak. Di wie mii siit, di tuu krokodail dem a fatn dem wan big beli aafa puor piipl.

- Carolyn Cooper is a consultant on culture and development. Email feedback to columns@gleanerjm.com and karokupa@gmail.com.