Sat | Nov 17, 2018

Carolyn Cooper | Dem fi stop tek Patois fi joke!

Published:Sunday | October 21, 2018 | 12:00 AM

 

CHAKA-CHAKA SPELLING

 

Pon October 11, 2018, Gleaner put out one article wid dis ya headline, 'PEP in the universe of Patois'. Mi wonder if di smaddy weh write dat deh article know seh di 'universe of Patois' big an broad fi true. Fi wi Jamaican language a ongle one a di nuff-nuff Creole language dem weh people all over di universe start fi learn from dem deh eena dem mumma belly. More dan 40 Creole language out deh!

Den Gleaner throw word pon Ronnie Thwaites inna di said same article. Inna 2012, wen Thwaites did a di minister a education eena PNP govament, im did seh, "The language of employment, of instruction, of professionalism, the language of world view is the English language, not anything else." Dat sound like seh a diss im a diss fi wi Jamaican language. It a di "anything else". An it cyaan use fi teach pikni nutten.

Now dat PNP eena Opposition, Thwaites a change im mouth. Pure politics! Look wa im write seh eena wan article, 'Language is the problem', weh Gleaner put out pon October 8: "In Jamaica, the fissure between the command of Standard English required for PEP and the familiarity of most students only in Jamaican Creole creates the huge difference in outcomes and explains much of what we are bemoaning in the exam results." Di problem a no language. A di hypocrite politician dem!

 

BIG UP PROF DEVONISH!

 

A now Thwaites find out seh di pikni dem no understand English to dat? Look how long di people dem weh study language, all like Prof Hubert Devonish, a tell govament seh dem ha fi use di pikni dem yard language eena school! Dat a common sense. Pikni cyaan learn nutten if dem no understand wa teacher a seh.

A Prof Devonish start up di Jamaican Language Unit (JLU) inna di University of the West Indies (UWI). An di JLU change over nuff a di primary school book dem from English to Jamaican. Di pikni dem can learn fi read an write eena di two language. Proper-proper! Same like whole heap a odder pikni all over di world weh start off school a use dem yard language. Den dem learn one next language pon top a dat.

Gleaner a force PNP fi stand up fi principle: "Mr Thwaites has made a substantial political move, having, as his party's spokesman on education, placed the matter squarely on the agenda. The PNP now has to make clear whether his statement was a declaration of policy."

Next week Sunday, a International Creole Day. Me want know weh di PNP an di JLP a go do fi celebrate di day. Pon Thursday, Prof Devonish a go gi one lecture, 'An Official Language Policy For Jamaica', eena di Neville Hall Lecture Theatre (N1), 2:30 eena di afternoon. Di public can come. Prof Devonish a retire from UWI an fi im lecture a di highlight a one conference weh di Department of Language, Linguistics and Philosophy a put on pon Thursday an Friday fi big im up. Nuff rispek due!

 

PRAPA-PRAPA SPELIN

 

Pan Aktuoba 11, Gleaner put out wan aatikl wid dis ya edlain, 'PEP in the universe of Patois'. Mi wanda if di smadi we rait dat de aatikl nuo se di 'universe of Patois' big an braad fi chruu. Fi wi Jamiekan langgwij a ongl wan a di nof-nof Kriyuol langgwij dem we piipl aal uova di yuunivors staat fi lorn fram dem de iina dem muma beli. Muor dan faati Kriyuol langgwij out de!

Den Gleaner chruo word pan Ronnie Thwaites ina di sed siem aatikl. Ina 2012, wen Thwaites did a di minista a edikieshan iina PNP govament, im did se, "The language of employment, of instruction, of professionalism, the language of world view is the English language, not anything else." Dat soun laik se a dis im a dis fi wi Jamiekan langgwij. It a di "anything else". An it kyaahn yuuz fi tiich pikni notn.

Nou dat PNP iina Apazishan, Thwaites a chienj im mout. Pyuur palitiks! Luk wa im rait se iina wan aatikl, 'Language is the problem', we Gleaner put out pan Aktuoba 8: "In Jamaica, the fissure between the command of Standard English required for PEP and the familiarity of most students only in Jamaican Creole creates the huge difference in outcomes and explains much of what we are bemoaning in the exam results." Di prablem a no langgwij. A di ipokrit palitishan dem!

 

BIG OP PROF DEVONISH!

 

A nou Thwaites fain out se di pikni dem no andastan Ingglish tu dat? Luk ou lang di piipl dem we stodi langgwij, aal laik Prof Hubert Devonish, a tel govament se dem a fi yuuz di pikni dem yaad langgwij iina skuul! Dat a kaman sens. Pikni kyaahn lorn notn if dem no andastan wa tiicha a se.

A Prof Devonish staat op di Jamaican Language Unit (JLU) ina di University of the West Indies (UWI). An di JLU chienj uova nof a di praimeri skuul buk dem fram Ingglish tu Jamiekan. Di pikni dem kyahn lorn fi riid an rait iina di tuu langgwij. Prapa-prapa! Siem laik uol iip a ada pikni aal uova di worl we staat aaf skuul a yuuz dem yaad langgwij. Den dem lorn wan neks langgwij pan tap a dat.

Gleaner a fuors PNP fi stan op fi prinsipl: "Mr Thwaites has made a substantial political move, having, as his party's spokesman on education, placed the matter squarely on the agenda. The PNP now has to make clear whether his statement was a declaration of policy."

Neks wiik Sonde a International Creole Day. Mii waahn nuo we di PNP an di JLP a go du fi selibriet di die. Pan Torsde, Prof Devonish a go gi wan lekcha, 'An Official Language Policy For Jamaica' iina di Neville Hall Lecture Theatre (N1), 2:30 iina di aaftanuun. Di poblik kyahn kom. Prof Devonish a ritaiya fram UWI an fi im lekcha a di ailait a wan kanfrens we di Department of Language, Linguistics and Philosophy a put aan pan Torsde an Fraide fi big im op. Nof rispek juu!

- Carolyn Cooper, PhD, is a specialist on culture and development. Email feedback to columns@gleanerjm.com and karokupa@gmail.com.