Wed | Oct 28, 2020

Carolyn Cooper | Govament a hide up di truth bout di virus?

Published:Sunday | October 18, 2020 | 12:16 AM

CHAKA-CHAKA SPELLING

Mad smaddy a borrow mask! One a mi friend dem tell mi seh when di wholesale shop dem downtown nah let een customer if dem no have on no mask, di mad smaddy dem go outa road an beg a next mad smaddy fi lend dem fi dem mask. A coulda never cheap dem so cheap mek dem nah buy fi dem owna mask. A must fool dem fool. Dem no know seh mask nuff nuff cheaper dan doctor bill, pharmacy bill an hospital bill?

Pon top a dat, it look like seh nuff smaddy nuh understand wa mask good fa. Dem nuh know seh mask stop di virus from run all bout from one smaddy to di next smaddy an round an round. A must dat mek dem a wear mask pon dem chin, pon dem neck, a heng offa dem ears. An even if dem mout cover, dem nose lef outa door. Some a dem nah wear mask at all, at all. It eena dem hand or eena dem pocket.

Mi see seh Govament a gi virus warning eena two language: English an Jamaican. Mi did tink seh people woulda listen di warning dem eena fi wi heart language. But it no look so. It come een like seh dem a wait fi hear seh nuff, nuff smaddy a dead sake a di virus. An a den dem a go frighten an start tek it serious. It a go too late. Old-time people seh, prevent better dan cure.

VIRUS GET WEH

Mi a wonder if Govament a tell wi di truth bout how much a wi get di virus. Mi nah figet how di PNP govament did tell lie bout Chik-V. Mi nuh trust none a fi wi bad-breed politician dem. Up to Friday gone, dem seh 8,067 a wi ketch di virus; 3,237 a wi get better; an 160 a wi dead. Govament nah test di whole a wi. So when dem seh “confirmed cases”, dat no mean nutten much. Wa bout di whole a wi weh no “confirm”? An as fi get better! Yu mighta nuh dead. But di virus mash up nuff, nuff smaddy. Dem nuh ketch up back demself.

Pon September 4, di day after di hurry-come-up election, Jamaica Information Service (JIS) gi out one report wid dis ya headline, ‘Government declares community spread of COVID-19’. Hear wa di health minister Dr Christopher Tufton seh: “Community transmission means the inability to relate confirmed cases through chains of transmission for a large number of cases, and the increasing positive tests through sentinel samples, especially from persons coming to health centres and hospitals.”

A who Tufton tink understand dat? Perhaps, im no waan di whole a wi fi know wa a gwaan. Di virus get weh eena di country. Govament stop try find out how it a spread. Dem gi up. An dem warn wi fi gwaan like seh everybody got di virus. Friday gone, Gleaner put out wan report, ‘Tufton: Jamaica could reach COVID-19 peak soon.’ It look like seh Tufton im no understand wa ‘peak’ mean. Dat a when di virus spread laka wild fire. Di hard-ears people dem weh nah wear no mask, dem a go kill off nuff a wi. Govament better find a way fi force dem fi wear mask. If dem nuh hear, dem must feel.

PRAPA-PRAPA SPELIN

Mad smadi a baro maask! Wan a mi fren dem tel mi se wen di uolsiel shap dem dountong naa let iin kostama if dem no av aan no maask, di mad smadi dem go outa ruod an beg a neks mad smadi fi len dem fi dem maask. A kuda neva chiip dem so chiip mek dem naa bai fi dem uona maask. A mos fuul dem fuul. Dem no nuo se maask nof nof chiipa dan dakta bil, faamasi bil an aaspital bil?

Pan tap a dat, it luk laik se nof smadi no andastan wa maask gud fa. Dem no nuo se maask stap di vairos fram ron aal bout fram wan smadi tu di neks smadi an roun an roun. A must dat mek dem a wier mask pan dem chin, pan dem nek, a eng aafa dem iez. An iivn if dem mout kova, dem nuoz lef outa duor. Som a dem naa wier maask at aal, at aal. It iina dem an ar iina dem pakit.

Mi si se Govament a gi vairos waanin iina tuu langgwij: Ingglish an Jamiekan. Mi did tingk se piipl wuda lisn di waanin dem iina fi wi aat langgwij. Bot it no luk so. It kom iin laik se dem a wiet fi ier se nof, nof smadi a ded siek a di vairos. An a den dem a go fraitn an staat tek it siiryos. It a go tuu liet. Uol-taim piiipl se, privent beta dan kyuur.

VAIROS GET WE

Mi a wanda if Govament a tel wi di chruut bout omoch a wi get di vairos. Mi naa figet ou di PNP govament did tel lai bout Chik-V. Mi no chros non a fi wi bad-briid palitishan dem. Op tu Fraide gaan, dem se 8,067 a wi kech di vairos; 3,237 a wi get beta; an 160 a wi ded. Govament naa tes di uol a wi. So wen dem se “confirmed cases,” dat no miin notn moch. Wa bout di uol a wi we no “confirm”? An az fi get beta! Yu maita no ded. Bot di vairos mash op nof, nof smadi. Dem no kech op bak demself.

Pan Septemba 4, di die aafta di ori-kom-op ilekshan, Jamaica Information Service (JIS) gi out wan ripuort wid dis ya edlain, ‘Government declares community spread of COVID-19’. Ier wa di elt minista Dr Christopher Tufton se: “Community transmission means the inability to relate confirmed cases through chains of transmission for a large number of cases, and the increasing positive tests through sentinel samples, especially from persons coming to health centres and hospitals.”

A uu Tufton tingk andastan dat? Paraps, im no waahn di uol a wi fi nuo wa a gwaan. Di vairos get we iina di konchri. Govament stap chrai fain out ou it a spred. Dem gi op. An dem waan wi fi gwaan laik se evribadi gat di vairos. Fraide gaan, Gleaner put out wan ripuort, “Tufton: Jamaica could reach COVID-19 peak soon.” It luk laik se Tufton im no andastan wa ‘peak’ miin. Dat a wen di vairos spred laka wail faiya. Di aad-iez piipl dem we naa wier no maask, dem a go kil aaf nof a wi. Govament beta fain a wie fi fuors dem fi wier maask. If dem no ier, dem mos fiil.

– Carolyn Cooper, PhD, is a specialist on culture and development. Email feedback to columns@gleanerjm.com and karokupa@gmail.com.